Саха сиригэр үгүс улууска уот ситимнэрэ эргэрбиттэрин кыһалҕата баар. Ону таһынан, билигин тыа сирдэригэр нэһилиэктэр кэҥээн, улаатан иһэллэринэн уот кыамтата тиийбэтэ биир сытыы боппуруос буолан турар.  Холобур, Сунтаар улууһугар өссө 2010 сыллаахха үрдүк кыамталаах уот кэлэригэр диэн анал подстанция тутуллан үлэҕэ киирбитэ. Ити сыл подстанцияттан үрдүк кыамталаах линия Өлүөхүмэ улууһугар тардыллыбыта, бу кэлэр сылларга Ньурбаҕа тиийиэхтээх. Сунтаар улууһун баһылыгын эбээһинэһин толорооччу Анатолий Григорьев: *Биһиги улууска, кырдьык, бу биир сытыы кыһалҕа. Улуус олохтоохторо Бүлүү ГЭС республика үгүс өттүн хааччыйан олорор эрээри, бэйэбит бу уоту сатаан туһаммаппыт диэн өйдөөбөт, хом санааларын биллэрэр түгэннэрэ үгүс.

Сунтаар улууһугар президент Егор Борисов кэлэ сылдьан, кыһалҕаны кытта билсэн баран, *уот ситимнэрин саҥардыыга уонна сааһылааһыҥҥа *Якутскэнерго* хампаанньаны кытта дуогабар түһэрсэн, программа олохтоон үлэлэһэргит наада* – диэн эппитэ. Маныаха уопсайа 1 миллиард 200 тыһыынча солкуобай харчы наада диэн буолбута. Программа оҥорор үлэ саҕаланна* – диэн этэр.