Каникул буолан, куораттан дэриэбинэлэргэ сиэттэр эбээлэригэр, эһээлэригэр кэллилэр. Үөрүү-көтүү элбээтэ.
Куорат нууччалыы тыллаах оҕолорун тута сахалыы тылга көһөрө сатааһын эһээлэргэ ыарахан таһаҕас буолла. Ол гынан, күнтэн күн кээрэтэн, хамсааһын баар буолсу.
Куорат оҕото, дьиэ иһигэр тэһийэр, хамсаммат буолан, аанньа аһаабат, нукаай-икээй курдук. Ол эрээри, сааскы сылаас күн таһырдьа таһааран оонньоттоххо, сэргэхсийбит, имнэрин хаана кытарбыт буолар.
Ордук убаһаҕа, ньирэйгэ бэртэр эбит. Сысталлара сүр. Уолаттар, сатаан көрдөрдөххө, үлэһиттэр. Хаары таһыыга бэртээхэй көмөлөһөөччүлэр.
Сыыртан түһэн, хаарга буккуллан, тэбэнэн-сахсынан дьиэҕэ киирдэхтэринэ, толору астаах остуолга, дьэ, аппетиттанан аһыыллар эбит. Оттон дьиэҕэ хаайтардахтарына, остуолга аһыыр-аһаабат олорон, эһээ, эбээ санаатын түһэрэллэр.
Ок... Арай биһиги курдук дэриэбинэҕэ улааппыт буоллунар. Таһырдьа оонньоон, үлэлээн, буһан-хатан абыраныах эбиттэр. Хаһаайыстыбалаах буоллахха, этинэн, арыынан, үрүҥ аһынан аһаан төлөһүйүөх дьон.
Тыа сирэ "чуумпу дьол" үөскүүр сирэ эбит. Сүөһүнү, үрүҥ аһы эһии, кэнчээри ыччаппыт ииммит-хаппыт, нукаай курдук буолууларыгар тиэрдэр эбит.
Куорат, төһө да толору хааччыллыылаах дьиэтэ, оскуола оҕотун эт-хаан өттүнэн сайдыытын, билиитин-көрүүтүн хаҥааһынын, тулалыыр эйгэни кытта алтыһыытын хаарчахтыыр эбит.
Ону эдэр төрөппүттэр сэрэйбэттэр эбит. Этэн да «ээхтэрэ» кэлбэт, дэриэбинэҕэ эргиллибэттии, эргийбэттии киин сиргэ "хатаммыттар".
Федот Харитонов суруйуута.
