Босхо айан, аһылык, үөрэххэ киирэргэ көмө: элбэх оҕолоох ыалы хайдах өйүүллэр?

Бэҕэһээ тэлэбиидэнньэҕэ уонна араадьыйа буолбут аһаҕас эфир кэмигэр Ил Дархан Айсен Николаев элбэх оҕолоох ыаллары өйүүр миэрэлэр тустарынан кэпсээтэ.

Ол курдук, элбэх оҕолоох ыаллар оҕолоро хаһыс кылааска үөрэнэллэриттэн тутулуга суох, оскуолаҕа бары босхо итии аһылыгынан хааччыллыахтара. Санаттахха, билигин Арассыыйаҕа босхо итии аһылыгынан алын кылаас оҕолоро эрэ хааччыллан олороллор.

Итини таһынан, Айсен Николаев “Карта юного жителя Якутии” диэни тэрийэн эрэллэрин туһунан иһитиннэрдэ. Ол каартанан 7 – 13 саастаах оскуола үөрэнээччилэрэ култуура-сынньалаҥ тэрээһиннэригэр киирэр билиэти, успуорт сиэксийэлэрин төлөбүрүн, араас сайыннарар уонна үөрэтэр бырагыраамалары төлүөхтэрин сөп буолар.

“Ити каарта аҥаардас элбэх оҕолоох ыал оҕолоругар эрэ буолбакка, барыларыгар сыһыаннаах. Син биир “Пушкин каартатын” курдук, ити каарта көмөтүнэн оҕолорбут өрөспүүбүлүкэтээҕи култуура тэрилтэлэригэр сылдьар кыахтаныахтара”, – диэтэ Ил Дархан.

Итини сэргэ, орто анал үөрэххэ туттарсар элбэх оҕолоох ыал оҕолоругар үөрэх төлөбүрүн толуйарга 50 тыһыынча солкуобайдаах сэртипэкээттэр туттарыллыахтара үһү.

“Ити быһаарыы оҕолор сэдэх, үлэһит илии тиийбэт идэлэрин баһылаан тахсалларыгар, үлэ миэстэтин булалларыгар көмөлөһүөхтээх. Билигин үрдүк таһымнаах исписэлиистэргэ наадыйыы күн аайы элбээн иһэр, кинилэр хамнастара улаата турар”, – диэн Айсен Николаев бэлиэтээтэ.

Аны туран, Саха сирин элбэх оҕолоох ыалларын уопсастыбаннай көлөҕө босхо бырайыаһынан хааччыйыахтара. Онно эбии кинилэргэ ЖКУ төлөбүрүгэр чэпчэтии көрүллүөҕэ. Ил Дархан этэринэн, ол суумата ботуччу буолуо үһү.

Санатар эбит буоллахха, быйыл дойду бэрэсидьиэнэ 2024 сылы Дьиэ кэргэн сылынан биллэрбит. Оттон Саха сиригэр – Оҕо саас сыла.