Дьокуускай куорат норуоттар икки ардыларынааҕы салгын пуордугар “кутталлаах инпиэксийэ кэлэр түгэнигэр” диэн анал эрчийэр үөрэх буолла. Үөрэх номоҕун быһыытынан, сөмөлүөтүнэн холераҕа уорбаланар икки киһи – оҕолоох ийэ – көтөн кэлбиттэр. Ыарыыны тарҕаппат туһугар, бары сулууспалар чопчу инструкциянан үлэлээтилэр. Ол туһунан СИА суруйар.
Эмиэ номоххо этиллэринэн, сөмөлүөт Харбинтан кэлбит. Оҕолоох ийэ Индияттан күүлэйдээн кэлэн иһэн эмискэ ыалдьыбыттар: үөһүрбүттэр, хотуолаабыттар, эмискэ сэниэлэрэ эстибит.
ОҔОЛООХ ДЬАХТАР
“Сөмөлүөккэ Индияттан иһэр, ис-үөс инпиэксийэтигэр сутуллубут дьон баара билиннэ. Оҕолоох дьахтар сиикэй ууну испиттэрин уонна сууйуллабатах оҕуруот аһын сиэбиттэрин мэлдьэспэт”, – диэн үөрэҕи салайааччы, Роспотребнадзор Саха сиринээҕи салаатын көлө надзоругар уонна территория саньытаарынай харыстабылыгар салаатын салайааччыта Юрий Степанов кэпсээтэ.
Сөмөлүөккэ барыта 30-ча киһи баар эбит – айанньыттар, кэтээн көрөөччүлэр уонна экипаж чилиэннэрэ. Симптомнарын билэн баран, бортпроводниктар оҕону уонна дьахтары иллэҥ миэстэлэргэ көһөрөн биэрдилэр. Итинник түгэн үөскээтэҕинэ, ыарыһахтарга, бэл, туспа туалет кытта көрүллэр эбит.
ЧУМАТТАН ХАРЫСТЫЫР ТАҤАС
Сөмөлүөт сиргэ түһээтин кытта, бастакынан Роспотребнадзор саньытаарынай-харантыынныыр пуунун үлэһиттэрэ киирдилэр. Кинилэр ыарыһахтары көрдүлэр, тугу испиттэрин, аһаабыттарын сурастылар. Ити кэннэ салгыы медиктэр уонна салгын пуордун үлэһиттэрэ үлэлээтилэр. Итини таһынан, Роспотребнадзор исписэлиистэрэ бары айанньыттар температураларын кэмнээтилэр.
Сынаарый быһыытынан, бортпроводниктар диспиэтчэргэ иһитиннэриини өссө көтөн иһэн ыыппыттар. Онон, сөмөлүөт кэлэрин бары сулууспалар эрдэттэн күүппүттэр.
ДЕЗИНФЕКЦИЯ УОННА АЙАННЬЫТТАРЫ ТИЭЙИИ-ТАҺЫЫ
Идэлээх дьон барыны-бары бэрэбиэркэлээбиттэрин кэннэ, сөмөлүөттэн медиктэр уонна полиция үлэһиттэрэ арыалдьыттаах бастакынан ыарыһахтар таҕыстылар. Кинилэри Өрөспүүбүлүкэтээҕи уонна оҕо инфекционнай балыыһаларыгар илтилэр.
Кинилэр кэннэ боростуой айанньыттар таҕыстылар, кинилэри эмиэ дезинфекциялыыр сулууспа көрүстэ. Ол кэннэ барыларын анал оптуобуһунан өрөспүүбүлүкэтээҕи 3-с №-дээх балыыһаҕа илдьэн, обсерваторга киллэрдилэр. Сөмөлүөтү эмиэ дезинфекциялаатылар.
Маннык үөрэх сыл аайы ыытыллар. Быйылгы үөрэххэ “Азия оҕолоругар” бэлэмнэнии чэрчитинэн, сүүрбэччэ араас министиэристибэ, биэдэмистибэ уонна тэрилтэ бэрэстэбиитэлэ кытынна. Үөрэх кэмигэр салгын пуорда тохтообокко үлэлии турда.
Санаттахха, VIII төгүлүн ыытыллар “Азия оҕолоро” быйыл Дьокуускайга бэс ыйын 25 күнүттэн от ыйын 7 күнүгэр диэри ыытыллыахтаах.
