Кэлиҥҥи кэмҥэ Саха сиригэр баан пластик хаартатын бас билээччилэри төлөпүөн нөҥүө албынныыр түбэлтэлэрэ элбээбит. Элбэх үҥсүү киирэр эбит, онон ИДьМ билигин бэрэбиэркэ ыыта сылдьар диэн СИА суруйар.

Массыанньыктар: «Ваша карта блокирована. СРОЧНО позвоните на телефон...», – диэн СМС-иһитиннэрии ыыталлар. Онно эрийдэххэ, баан үлэһитэбин дэнэллэр, атын дьон харчы уста сатаабыт буолан, эн хаартаҥ сабыллыбытын туһунан этэллэр.

Ону хат үлэлэтэр туһуттан чугастааҕы банкомакка тиийэн суһаллык хаартаҕа баар харчыны барытын төлөпүөҥҥэ көһөрөр наадатын ыйаллар. Ол төлөпүөн нүөмэрин бэйэлэрэ этэн биэрэллэр.

Быраабы араҥаччылааччылар итинник иһитиннэрии кэллэ да, быһаччы хаартаны биэрбит бааҥҥа тиийэргэ эбэтэр хаарта кэннигэр сурулла сылдьар төлөпүөнүнэн бааҥҥа эрийэн чопчулуурга сүбэлииллэр.

Чахчы массыанньыктар буолалларын мантан билиэххэ сөп: 1) иһитиннэрии ыыппыт төлөпүөн нүөмэрэ атын эрэгийиэн киэнэ буолар (Саха сиринээҕилэр 8914...,8984...,8924...,8964... диэнтэн саҕаланаллар); 2) массыанньыктар бу кыһалҕаны бааҥҥа тиийэ сатаабакка эрэ, чугастааҕы банкомат көмөтүнэн быһаарыахха сөп дииллэр; 3) харчыны көһөрүөхтээх төлөпүөнүҥ нүөмэрин бэйэлэрэ ыйаллар; 4) харчыны барытын олус түргэнник көһөрө охсорго этэллэр, ыксаталлар.

Сэрэниҥ, хара көлөһүҥҥүтүн харыстааҥ!