Бэҕэһээ, Олоҥхо күннэрин декадатын үөрүүлээх быһыыга-майгыга арыйыы буолла. Ахсынньы 5 күнүгэр диэри 60 тахса эгэлгэ тэрээһин ыытыллыахтаах. Өксөкүлээх Өлөксөй аатынан норуоттар доҕордоһууларын дьиэтигэр норуодунай эпоһы толорооччулары уонна тарҕатааччылары чиэстээһин буолла. Түмүккэ Олоҥхо Тыйаатыра туруорбут Н.П. Бурнашев «Кыыс Дэбилийэ Бухатыыр» айымньытынан олоҥхо испэктээҕи көрдөрдүлэр, режиссерунан Степанида Борисова буолбут.
Санатар буоллахха, декада тэрээһиннэрэ сэтинньи 22 күнүттэн саҕаламмытара. Былаан быһыытынан 60 тахса тэрээһин ыытыллыахтаах: тэлэбиидэнньэҕэ уонна куйаар ситимигэр биэриилэр, кэмпириэнсийэлэр, лиэксийэлэр, куонкурустар, быыстапкалар уо. д. а. Олоҥхо декадатын тэрээһиннэрин туһунан Саха култууратын Министиэристибэтин саайтыттан киирэн билсиэххитин сөп.
Сэтинньи 25 күнүгэр Өксөкүлээх Өлөксөй аатынан норуоттара доҕордоһууларын дьиэтигэр Олоҥхо күннэрин арыйыы үөрүүлээх чааһа буолла. Манна Саха култууратын миниистирэ Юрий Куприянов уонна Ил Түмэн бэрэссэдээтэлин бастакы солбуйааччыта ) Александр Жирков тыл эттилэр.
Бу күн көрөөччүлэр олоҥхо эгэлэгэтин иһиттилэр, толорооччулары наҕараадалаатылар уонна саха норуодунай эпоһын тарҕатыыга уонна харыстааһыҥҥа Национальнай бириэмийэни туттарбыттара.
Култуура миниистирэ өрөспүүбүлкэҕэ саха норуодунай эпоһын тула үлэҕэ улахан болҕомто уурулларын туһунан эттэ уонна бу Олоҥхо декадатын чэрчитинэн ыытыллыахтаах тэрээһиннэр тустарынан сырдатта.
Ааспыт сылга бырабыыталыстыба уонна Ил дархан Айсен Николаев быһаарбыттарынан, «Дьулуруйар Ньургун Боотур» олоҥхо сахалыы кинигэтин саҥаттан таһаарыахтаахтар.
«Аныгыс сылга, маны таһынан, «Ньургун Боотур» опера Улахан Тыйаатыр сыанатыгар туруоруллара былааннанар. Бу сылга Саха АССР тэриллибитэ 100 сылыгар анаммыт Олоҥхо Ыһыаҕа Үөһээ Бүлүүгэ ыытыллыаҕа, тэрээһин үлэтэ саҕаланан эрэр, толору бырагыраама күүтүллэр», - диэн Юрий Куприянов эттэ.
Василий Кононов хаартыскаҕа түһэриитэ
