Ил Дархан Айсен Николаев бэйэтин телеграм-ханаалыгар бу күннэргэ хомондьуруопкаҕа бара сылдьан Донецкай Норуодунай Өрөспүүбүлүкэҕэ үлэлээбитин туһунан кэпсээтэ. Кини элбэх салайааччыны, дьону, тэрилтэни кытта көрсүбүт.
- ДНР баһылыгын э.т. толорооччу Денис Пушилины көрсүбүт. Пушилин Саха сиригэр сыһыана олус үчүгэй. Саҥа дьылынан, бырааһынньыктарынан сахалыы эҕэрдэлиирин истибит буолуохтааххыт. Айсен Сергеевич кинилиин быйылгы былаан быһыытынан барар үлэни, инникитин салгыы бииргэ үлэлэһии туһунан кэпсэппит.
- Д.Пушилин Донецкайтан Айсен Сергеевичтыын бииргэ өрөспүүбүлүкэ чөлүгэр түһэрэр үлэни ыытар Кировскай куоратыгар бара сылдьыспыт. Бу икки куораттар икки ардылара 54 км, суоллара үчүгэй.От ыйын 15 үлэҕэ киириэхтээх МФЦ дьиэтин оҥоруу туругун кытта билсибиттэр.
- Ил Дархан быйыл үлэҕэ киирэргэ былааннаммыт 28 эбийиэктэргэ үлэ туругун хонтуруоллаабыт.
- Быйыл аһыллыахтаах музыкальнай оскуола кэлэктиибин кытта көрсөн кэпсэппит.
- Кировскай куорат салалтатын, тэрилтэлэрин салайааччыларын кытта оробуочай көрсүһүү оҥорбут. Олохтоохтор Саха сиригэр көмөлөрүн иһин махталлара улахан. Итиниэхэ манна куораты чөлүгэр түһэриигэ күүстэрин харыстаабакка үлэлии сылдьар биһиги дьоннорбут үтүөлэрэ улахан.
- Куорат дьаһалтатыгар хомунаалынай тэрилтэлэргэ анал тиэхиньикэни илдьэн туттарбыт.
- Кировскай куорат оскуолаларын бүтэрээччилэр үөрүүлээх тэрээһиннэригэр сылдьан оҕолорго бэлэх туттартаабыт уонна инники олохторугар ситиһиини баҕарарын туһунан эппит.
- Мэдиссиинэ үлэһитин күнүгэр полевой госпитальга сылдьан үлэһиттэри бырааһынньыктарынан эҕэрдэлээбит, үлэлэрин-хамнастарын билсибит. Бэлэхтэри, эми-тому, атын да үлэлэригэр наадалаах матырыйаллары туттарбыт.
- Байыаннай эпэрээссийэ сиригэр “Илин” диэн сэриилэр бөлөхтөрүн хамандыырдарын кытта көрсүбүт. Командование өрөспүүбүүлүкэттэн кэлбит байыастар бойобуой соруктары толорууга хорсуннарын бэлиэтээн эппиттэр.
Айсен Сергеевич түмүгэр: “ДНР биһиги Арассыыйабыт биир быстыбат сорҕото буолла. Биһиги бары биир ыал буолан олорорбутунан бэйэ-бэйэбитигэр көмөлөһүөхтээхпит, өйөһүөхтээхпит, үлэ салҕанар”, - диэн түмүктээбит.
Айсен Николаев Кировскайга, ДНР-га элбэхтик сырытта. Саха сирэ куораты Украина нацистара сэриилээн алдьаппыт эбийиэктэрин чөлүгэр түһэриигэ күүстээх үлэни ыытар. Уһук Илинтэн 2022 с. түмүгүнэн саамай бастыҥ үлэлээх регионунан буолбута.
Бэйэ кэр.
