СИА иһитиннэрбитинэн, эһиил буолуохтаах «Азия оҕолоро» спортивнай күрэххэ, бүгүҥҥү күн туругунан, 17 дойду кыттарын бигэргэттэ. Билигин кыттааччылар сайаапкалара, ханнык көрүҥҥэ хас оҕо кыттыахтааҕа чуолкайдана сылдьар. Бу туһунан тас сибээскэ миниистир солбуйааччыта Фаина Соколова иһитиннэрдэ. Азербайджан, Вьетнам, Индия, Ирак, Иран, Кытай, Пакистан, Палестина, Корея Республиката, Узбекистан, Сингапур, Сирия, Таджикистан, Казахстан, Туркменистан, Шри-Ланка, Малайзия дойдулара кытталларын туһунан бигэргэттилэр. Маны таһынан Бахрейн, Бутана, Камбоджи, Катара, Лаос, Мальдивия Республиката, Саудовскай Аравия, Таиланд, Япония уонна Монголия оонньууну олус сэргээбиттэрин, интэриэһиргээбиттэрин биллэрдилэр.

Билигин бу дойдулары кытта сүбэлэһии бара турар.
Маны таһынан Бутан, Камбоджия, Мальдива уонна Монголия дойдулара айан төлөбүрүгэр көмө көрдөөбүттэр. Бу боппуруоһу тэрийэр кэмитиэт бэрэссэдээтэлэ, республика вице-президиэнэ Дмитрий Глушко хонтуруоллуур. Ф.Соколова иһитиннэрбитинэн, айан төлөбүрүгэр үп-харчы федеральнай бюджеттан тыырыллар эбит.
Маны таһынан Оман, Иордания уонна Армения оонньууга кыттартан аккаастаммыттар.
Сирия дойдута 354 спортсмены кытыннарарын туһунан биллэрбит. Бу оонньуу балаһыанньатын быһыытынан көҥүллэммэт. Хамаандаҕа спорт бары көрүҥнэригэр саамай элбээбитэ 80 кыттааччы баар буолуохтаах.
Маны таһынан СӨ футболга хамаандатын Кытайга ыытан дьарыктыыр туһунан боппуруос көрүлүннэ. Оҕолор аан дойду таһымыгар тахсалларыгар үчүгэй уопут буолуоҕа диэн тэрийээччилэр бэлиэтииллэр.
Арассыыйа регионнарыттан уопсайа 930 кыттааччы кэлэрэ күүтүллэр.