«Восток и Север» коммуникация ааҕыныстыбата уонна «Кыым» хаһыат көҕүлээһиннэринэн, олунньу 20 к. рекорд олохтонуо – 100 лиитирэ ынах үүтүн бүтэйдии тоҥоруохтара. Сахалар былыр-былыргыттан үүтү тоҥорор идэлээхпит. Маннык тоҥ үүт сыл аҥаарын устата буортуйбат, туһалаах эттиктэрин сүтэрбэт. Аныгы ирдэбилинэн «сойутуллубут үүт» икки эрэ суукка устата харайыллар, үгүс туһатын сүтэрэр диэн буолар. Үгэс курдук, тоҥ үүт дьоҕус кээмэйдээх гыныллар – муҥутаан 2 кг курдук. Оттон бу сырыыга бүтүн 100 киилэлээх тоҥ үүтү ылыахтара.

Рекорд Нам улууһун Модутугар баар «Тунал» комплекска олохтонуо. Манна Австрияттан кэлбит симментал боруодалаах ынахтар тураллар. Хас биирдиилэрэ сылга 4300 л тиийэ үүтү биэрэллэр. Пиэрмэ дириэктэрэ Ольга Борисова этэринэн, 5 тыһыынчаттан тахсаны да ыахха сөп үһү. Үүт сыата – 4,1-4,2 бырыһыан. Мантан 2,5 %-наах үүтү бэлэмнээн, атыыга таһаараллар.

100 киилэлээх тоҥ үүтү Чочур Мырааҥҥа ирбэт тоҥҥо харайыахтара, үс ый буолан баран, састааба төһө уларыйбытын үөрэтиэхтэрэ. Табылыннаҕына, «супер-брикет» атын дойдулартан кэлэр туристары сонурҕатыа, Саха сирин аата-суола үрдүүрүгэр көмөлөһүө.

«Саамай улахан тоҥ үүтү» аан дойдутааҕы рекордары бэлиэтиир кэмитиэт Арассыыйатааҕы бэрэстэбиитэлэ бигэргэтиэ. Арассыыйа уонна тас дойду суруналыыстара ыҥырылыннылар. Рекорд олохтонуутун көрөр, сырдатар баҕалаах суруналыыстар олунньу 20 күнүгэр сарсыарда 9 ч. Бэчээт дьиэтиттэн хоҥноллор.

Биһиги сыалбыт тоҥ үүтүнэн аһааҥ диэн ыҥырыы буолбатах. Аатырбыт 88 №-дээх ФЗ ирдэбилигэр тоҥ үүппүт, төһө да баҕарбыппыт иһин, хомойуох иһин, эппиэттэспэт. Ол эрээри тоҥ үүт дьиҥ туһата, кыаҕа кэнэҕэһин чинчийиллэн, дакаастанан, тупсарыллан, тоҥ үүтү тоҥоруу технологията киирэрэ тоҕо да сатаммат буолуой?