1921 сылга Дьокуускайга губерния бастакы профсоюзнай конференцията ыытыллыбыта. Бу сыл Саха сиригэр профсоюз төрүттэммит кэминэн ааҕыллан быйыл профсоюз 100 сыллаах юбилейын бэлиэтиир.
Профсоюз федерацията 24 отраслевой рескомнардаах. Ахсынньы 10 күнүгэр агропромышленнай комплекс профсоюһун рескома юбилейы бэлиэтиир үөрүүлээх мунньаҕы ыытта. Мунньахха реском бэрэссэдээтэлэ Борис Ануфриевич Николаев профсоюзтар билиҥҥи үлэлэрин, балаһыанньаларын туһунан дакылаат оҥордо, профсоюз активистарыгар федерация наҕараадаларын туттарда. Ол кэнниттэн дакылаат сүнньүнэн кэпсэтии буолла. Урут компартия баарына кими баҕарар профильнай үөрэҕиттэн тутулуга суох үлэҕэ аныыллар этэ. Ол гынан баран, каадыры үөрэтэн көрөн баран, кырдьык үлэлиэн сөптөөх киһини аныыллар этэ. Ол курдук, профсоюзка үлэ киһиэхэ хас да сылынан аргыый кэлэр уопутуран иһэҕин. Билиҥҥи кэмҥэ биир–биэс харчыта суох сүүрэ-көтө үлэлиир киһи суоҕун кэриэтэ, ол да буоллар уопсай дьыала туһугар эдэр ыччат дьоммут сыстан ылсан үлэлэһэн иһэллэрэ олус махталлаах суол. Инникитин хайдах хайысханы тутуһан бэйэлэрин тула эдэр ыччаты түмэн үлэлэһэр сорук турар. Профсоюз диэн бэйэтэ да дьону түмэр, көҕүлүүр тутулуга суох организация буолар.
Профсоюз 100 сылынан урут үлэлээн ааспыт агропромышленнай комплекс үлэһиттэрин улуустааҕы бэрэссэдээтэллэрин, активтары, чилиэннэри Агропромышленнай комплекс үлэһиттэрин профсоюһун аатыттан итиитик-истиҥник эҕэрдэлиибин. Кытаанах доруобуйаны, үлэҕэ ситиһиилэри, этэҥҥэ буолууну баҕарабын. Төһө да хамсык ыарыы хаайдар бары ыытыллар тэрээһиннэргэ актыыбынайдык кыттыһан, ыытыллар спартакиадаларга, фестивалларга көхтөөхтүк кыттан ситиһиилэрдээх сылбытын түмүктээн эрэбит.
Тыа хаһаайыстыбатын бары салаатын производственнай, оҥорон таһаарар кооперативтар, ветеринарнай управление коллективтарын, бары профсоюз чилиэттэрин үүнэр сылга профсоюз тула түмсэн таһаарыылаах үлэни көрдөрүөҕүҥ. Иннибитигэр улахан сорук турар. 2022 сылга Саха сиригэр Автономия тэриллибитэ 100 сылын көрсө улахан үлэ, түбүк күүтэр.
Кэлэн иһэр Саҥа дьылынан, Саҥа дьолунан!
Ирина Данилова
Ылыллыбыт сигэтэ: https://xn--80aaa3eca.xn--p1ai/article/34343
