СӨ Ил Дархана Айсен Сергеевич Николаев Бүлүү бөлөх улуустарыгар үлэлии тиийдэ. Оптуорунньукка Ил Дархан Ньурба улууһугар сырытта. Онно кини социальнай эбийиэктэр өрөмүөннэрин уонна тутуу үлэтин кытта билистэ, онтон суол туругун көрдө-иһиттэ.
Салгыы, Ил Дархан 2027 сыллаахха буолуохтаах Саха сирин норуоттарын X Спортивнай оонньууларын тэрийии туһунан мунньахха сылдьыаҕа. Маны таһынан, Бүгүн бырабыыталыстыбаны кытта Ньурба оройуонун дьаһалтата дьон-сэргэ доруобуйатын харыстабылын эйгэтигэр бииргэ үлэлэһии сөбүлэҥэр илии баттаныаҕа.
Ньурба оройуона, маны сэргэ, «Сахатранснефтегаз» хампаанньаны кытта оройуону гаастааһыҥҥа сөбүлэҥҥэ илии баттыаҕа. Күн иккис аҥаарыгар Айсен Николаев Үөһээ Бүлүүгэ үлэлиэҕэ, онно Куорамыкы күөл кытыла тупсарыллыбытын кэннэ саҥа арыллыытыгар сылдьыаҕа, Бүлүү өрүс биэрэгин бөҕөргөтүү үлэтин хаамыытын уонна ууну ыраастыыр тутуулар үлэлэрин бэрэбиэркэлиэҕэ.
Сарсын Ил Дархан Бүлүү оройуонугар сылдьыаҕа. Онно балыыһа комплексын уонна Г. И. Чиряев аатынан 1 №-х оскуола өрөмүөнүн көрүү-истии буолуоҕа. Маны таһынан, Айсен Николаев муниципальнай тэриллиилэри кытта 2022 сыллаахха кормозаготовительнай хампаанньа үлэтин тула мунньаҕы ыытыаҕа.
СӨ Ил Дарханын уонна Бырабыыталыстыбатын пресс-сулууспата
