“Кыым” хаһыакка суруйдахпытына, баҕар, туох эмэ туһа тахсаарай диэн санааттан Талыы Таатта биир уһук сытар нэһилиэгин биир улахан кыһалҕатын бу бүтүн өрөспүүбүлүкэни кытта үллэстэргэ сананныбыт. Дьэ, ол курдук, Таатта улууһун Даайа-Аммата диэн кытыы сытар нэһилиэгэр уот боппуруоһа сытыытык турар.
Биһиги төһө да Таатта улууһугар олордорбут, уоппут линията Чурапчыттан кэлэр. Бу күннэргэ уоппутун биэрбит графиктарыттан олох атын чааска ылан, бүтүн нэһилиэк дьоно эрэйи көрүстэ. Графикка сарсыарда 8-тан киэһэ 9-ка диэри диэн этэ да, билиҥҥитэ сарсыарда 7-тэн, киэһэ 10-ҥа диэри ылаллар.
Ама, төһө да кырыы сытар нэһилиэк буолларбыт, бачча уһуннук уоту ылаллара көҥүл дуо? Кыра нэһилиэк дьоно тулуйуохтара, айдаарыахтара суоҕа, олордуннар дииллэр дуу? Бу курдук өссө даҕаны муус устар маҥнайгы күнүгэр диэри олоруохтаахпыт...
ОДьКХ-быт чоҕо куһаҕан буолан дуу, дизелэ кыайбат буолан дуу, олорор дьиэлэрбит киһи этэрбэһэ суох сатаан сылдьыбат буолуор диэри сөрүүкүүллэр. Бу да иннинэ хас дьыл кэмин аайы сороҕор төрүт да биллэриитэ суох, сороҕор эмиэ биллэрии ыыппыт чаастарын тутуспакка, уоту ылан моһуоктаабыт күннэрэ баара. Ол курдук сайын аайы уоту түүн 12 чааска бирдэ баар буола сылдьыбыта. Санааҥ көрүҥ, түүн 12 чааска...
Бу тыа дьоно барахсаттар, ама да тыаҕа олорорбут иһин, үүт, эт аһылык биһигиттэн тахсара буолуо дии! Сарсыардааҥы ыам түүн уот кэлэн арыы сыаҕа үлэлиэр диэри аһыйара буолуо буолбат дуо?
“Кыым” хаһыат, биһиэхэ кыратык эмэ көмөлөһүө диэн эрэнэбит.
Таатта улууһун Даайа-Амматын нэһилиэгин олохтоохторо
Сэҥээриилэр