Анаабыр улууһун Сааскылаах сэлиэнньэтигэр сибээс волоконно-оптическай лииньийэтин тардан бүтэрдилэр. Ситими үөрүүлээхтик арыйыыга Арассыыйа сыыппараҕа миниистирэ Максут Шадаев уонна Ил Дархан Айсен Николаев кытыннылар. Бу күннэргэ сэлиэнньэ 22 социальнай эбийиэгин оптическай ситимнэргэ холбуохтара, оттон ахсынньыга суотабай сибээс кыаҕын 4G/LTE таһымыгар тиэрдиэхтэрэ.
“Аныгы олоҕу интэриниэтэ суох сатаан санаабаппыт. Бу дьоҥҥо табыгастаах олоҕу тэрийии сүрүн ирдэбилэ буолар. Арктика оройуоннарыгар волоконно-оптическай лииньийэни тардыы саҥа саҕаланна диэххэ сөп. Биһиги интэриниэтинэн уонна сибээһинэн өрөспүүбүлүкэ олохтоохторун барыларын хааччыйарга кыһаныахпыт”, - диэн Максут Шадаев эрэннэрдэ.
“Түргэн интэриниэт ситимэ Өлөөнүнэн уонна Дьилиҥдэнэн тардыллан Саскылаахха диэри тардылынна. Онтон аҕыйах ыйынан Үрүҥ Хайаны ааһан Хотугу Муустаах байҕалга тиийиэҕэ. Бу “Хотугу Синергия” тосхол бастакы хардыылара. Ол курдук, инники Өлөөҥҥө киллэрбиппит. Онон, Анаабыр иккис улуус буолар. Аны, 11 улууска киллэрэрбит хаалла”, - диэн Айсен Николаев эттэ.
«Ростелеком» тэрилтэ «Уһук Восток» макрорегиональнай филиалын дириэктэрэ Андрей Карташов 311 км уһуннаах лииньийэ тыйыс күҥҥэ-дьылга уустук ландшафтаах сиринэн-уотунан тардылынна диэн бэлиэтээтэ. Бырайыагы олоххо киллэриигэ тэрилтэни кытта Арассыыйатааҕы Билим Академиятын Ирбэт тоҥу үөрэтэр института үлэлэспит.
«Арктика синергията» бырайыак РФ Сыыппараҕа министиэристибэтин өйөбүлүнэн олоххо киирэр. Онон, 2025 сылга диэри Арктика бары улуустарыгар түргэн интэриниэт ситимэ тардыллыа. Ол түмүгэр, судаарыстыбаннай электроннай өҥөлөрү оҥоруу тупсуо, интэриниэт тарыыба сүүс төгүл кэриҥэ чэпчэтиэ, үөрэх хаачыстыбата үрдүө, мэдиссиинискэй көмөнү оҥоруу чэпчиэ диэн суруйаллар. Бырайыак үбүлээһинин 50% федеральнай киин уйунар.
Сонун төрдө: CӨ Бырабыыталыстыбатын уонна Ил Дарханын пресс-сулууспата
Хаартыска: ЯСИА
