МГУ эспиэрдэрэ биһиги эрэгийиэммит оройуоннарын уонна куораттарын хабан туран, 7-11 кылаас оҕолоругар улахан социологическай чинчийиини ыыппыттар. Сыл ахсын буолар Илдьит (Послание) чэрчитинэн, маннык дьаһалы өрөспүүбүлүкэ Ил Дархана Айсен Николаев СӨ Үөрэҕириитин уонна билимин министиэристибэтигэр биэрбит. Бу туһунан Саха Өрөспүүбүлүкэтин Ил Дарханын пресс-сулууспата иһитиннэрэр.
«Чинчийии түмүктэрэ уонна рекомендациялара олус кэрэхсэбиллээхтэр, онон, бу педагогическай уопсастыбаҕа уонна төрөппүттэр сүбэлэригэр диэри тиийиэҕэ диэн эрэнэбин», - диэн Айсен Николаев учууталлар XIV Сийиэстэрин кэмигэр эттэ.
Түмүккэ биллибитинэн, ыйытыыны барбыт 50% оҕо олорор сириттэн уонна сааһыттан тутулуга суох социальнай ситимнэргэ күҥҥэ 3 чаастан ордук олорор эбит. Маныаха, оҕолор улахан аҥаардарыгар үөрэнэн хаалыы куттала үөдүйбүт, оттон кинилэр виртуальнай олохторугар төрөппүт хонтуруола уонна кыттыгас буолуута олох суоҕун кэриэтэ эбит.
«Маннык түмүк түрбүөн үөдүйүүтүгэр олус улахан төрүөтүнэн буолар! Биһиги дьоһуннук ылсан туран, оҕолорго уонна ыччакка аналлаах, анимацияттан уонна видео-оонньуулартан саҕалаан үөрэтэр ресуртарга тиийэ араас форматтаах контеннары оҥорууга үлэлиэх тустаахпыт. Маны ситиһэргэ научнай уонна айар-тутар түмсүүлэр, «Саха НКИХ», биһиги хампаанньаларбыт үлэлэрэ туһаайыллыахтаах. Оҕолор олоҕу үтүө өттүнэн анаарыыларын олохтуурга туһуламмыт контены айыы хас биирдии айти-хампаанньа повесткатыгар баар буолуохтаах», - диэн Ил Дархан бэлиэтээн этэр.
Маны сэргэ, чинчийиилэр түмүктэрэ көрдөрөллөрүнэн, орто уонна улахан араҥа оҕолоро эбии үөрэхтээһиҥҥэ интэриэстэрэ сүппүтүн, билиигэ уонна билии кыаҕар тардыһар интэриэстэрин эйгэтэ кыччаабытын көрдөрөр.
«Бу «орто» уонна икки сыанаҕа үөрэнэр тыһыынчанан оҕо сөптөөх болҕомтото суох хаалбытын көрдөрөр буолбатах дуо? Хас биирдии оҕоҕо тус болҕомто ууруллуохтаах, ханнык даҕаны оҕону туораппакка сайдыыга сирдиир эйгэҕэ киллэриэхтээхпит. Бу судургу буолбатах. Ол эрээри, хас биирдии оҕо тус бэйэтин траекториятын сайыннарар үлэттэн ордук атын суол суох», - диэн Ил Дархан этэр.
Айсен Николаев Сийиэс быһаарыыларыгар, «кытаанах» профессиональнай компетенцияларын уонна «сымнаҕас» сатабылларын толору киллэрэн туран, хас биирдии Саха сиригэр олорор оҕону олоххо бэлэмнииргэ соруктары көрөргө сорудахтаата. Учууталлар уонна эрэгийиэн педагогическай уопсастыбаннаһын XIV Сийиэстэрин түмүгүнэн, 2030 сыллаахха диэри үөрэҕирии систиэмэтин сайыннарыыга Кэнсиэпсийэ уонна комплекснай былаан таҥыллыаҕа.
