От ыйын бүтүүтэ “Саханефтегазсбыт” АУо Арктика оройуоннарыгар баар филиалларыгар ньиэп бородуукталарын таһар үлэтин саҕалаата.
“Саханефтегазсбыт” АУо генеральнай дириэктэрэ, СӨ норуодунай дьокутаата Виктор Лебедев бүгүҥҥү туругунан ньиэп бородуукталарын тиэрдии болдьоммут кэмигэр баран иһэрин иһитиннэрдэ:
– Быйыл Хотугу муора суолунан таһыыга (СМП) былааннаммыт 32 150 туоннаттан 19 802 туонна тиэйилиннэ. Бу уопсай былааннаммыттан 62 %-на. От ыйын бүтүүтэ Арктика оройуоннарын ньиэбин базаларын тэрилтэлэригэр ньиэп бородуукталаах бастакы танкердар тиийбиттэрэ.
Быйыл тэрилтэ депонационнай саппааһы таһыы былаана 9 900 туоннаҕа тэҥнэһэр. Мантан 7 406 тиэйилиннэ, ити былаан 75 %-гар тэҥнэһэр. 5 254 туоннаны номнуо тиийиэхтээх миэстэтигэр тутан олороллор.
Сайыҥҥы уу суолунан тиэрдии саҕаланыаҕыттан араас хайысханан айанныыр суудуналарга 80 534 туонна ньиэп бородууктата тиэйиллибитэ. Ити былааннаммыт кээмэйтэн 54 %-нын ылар. Ол иһигэр Уус Кутунан айанныахтаах 58 659 туонна ньиэп бородууктата тиэйиллибитэ, ити былаан – 49 %-на.
2023 сыл навигациятыгар “Саханефтегазсбыт” АУо Өлүөнэ, Алдан, Бүлүү, Халыма, Индигиир, Дьааҥы өрүстэринэн ньиэп бородуукталарын таһар уопсай былаана 151 760 туоннаҕа тэҥнэһэр. “Саханефтегазсбыт” АУо өрөспүүбүлүкэ оройуоннарын тохтоло суох сылы эргиччи хаачыстыбалаах ньиэп бородуукталарынан хааччыйар.
Яна БАЙГОЖАЕВА, “Саханефтегазсбыт” АУо пресс-сэкирэтээрэ.
