От ыйын 28 күнүгэр “Биһиги бииргэ. Спорт” сайыҥҥы сурдлимпиада сайыҥҥы оонньууларын чэрчитинэн ыытыллыбыт көҥүл тустуу күрэхтэһиитэ түмүктэннэ. Пуорумҥа уопсайа 30 дойдуттан 21 көрүҥҥэ күрэхтэстилэр. Бу күрэхтэһии 2022 с. Арассыыйа спортсменнара суох ыытыллыбыт Рио-де-Жанейротааҕы (Бразилия) XXIV Сурдлимпийскай оонньуулар оннуларыгар ыытылынна.
57 киилэҕэ диэри Арассыыйа хамаандатын састаабыгар киирэн, биир дойдулаахпыт, тустуу оскуолатын иитиллээччитэ Егор Скрябин үрүҥ көмүс мэтээли ылла. Егор бастакы эргииргэ 2023 с. Арассыыйа чөмпүйэнээтин финалиһа Будажап Самбуевы кытта ыарахан киирсиигэ кииристэ. Өссө ыам ыйыгар Егор Наро-Фоминскайга Будажаптан хотторон турардааҕа эрээри, бу сырыыга 7:7 ахсааҥҥа кыайыыны ылары ситистэ.
Салгыы Дагестан бөҕөһө Магомедрасул Алиевы кытта киирсэн кыайыылаах таҕыста. Онтон финал аҥаарыгар Белоруссия бөҕөһө Алексей Халабурду 10:0 ахсаанынан итэҕэтиилээхтик кыайда. Егор Скрябин кыһыл көмүс иһин киирсиигэ Европа чөмпүйүөнэ, Арассыыйа билиҥҥи чөмпүйүөнэ Даба Цырендоржиевы кытта күөн көрүстэ уонна түмүгэр үрүҥ көмүс мэтээлгэ тигистэ.
От ыйын 31 күнүгэр спортсмены Дьокуускай аэропордугар спорт миниистирин э.т. Александр Бугаев, СӨ РЦСПСК дириэктэрин солбуйааччы Владимир Карпенко, сурдлимпиадаҕа тустууга өрөспүүбүлүкэ хамаандатын сүрүн тириэньэрэ Василий Стрекаловскай, чугас дьоно уонна доҕотторо көрүстүлэр.
“Бу киирсиигэ олус уһуннук бэлэмнэммиппит, ыйтан ордук сбордаммыппыт. Күрэхтэһии састааба, утарылаһааччылар үрдүк таһымнаах, күүстээх этилэр. Миэхэ тус тириэньэрим Прокопий Дмитриевич Николаев, тириэньэрдэр Василий Егорович Стручков уонна Василий Янович Стрекаловскай олус улаханнык көмөлөстүлэр”, – диэн санаатын этэр Егор Скрябин.
От ыйын 27-28 күннэрэ, Уфа.
Көҥүл тустуу. Сайыҥҥы сурдлимпиада
57 кг диэри. 1. Даба Цырендоржиев. 2. Егор Скрябин.
3. Будажар Самбуев.
65 кг диэри. 1. Денис Гончаров. 2. Камил Изудинов.
3. Сат Экер.
70 кг диэри. 1. Абудауд Ибрагимов. 2. Азамат Токмаков.
3. Натан Бадриев.
74 кг диэри. 1. Георгий Дзоциев. 2. Алаудин Гантемиров.
3. Шагмир Магомедов.
86 кг диэри. 1. Александр Цоктоев. 2. Михаил Богословенко.
3. Сайт-Муххамад Таипов и Геворг Адамян (Беларусь).
92 кг диэри. 1. Вячеслав Дзебисов. 2. Магомедзагир Мусаев.
3. Николай Капустин.
97 кг диэри. 1. Алексей Скляр. 2. Казбек Хугаев.
3. Альберт Чочиев .
125 кг диэри. 1. Алексей Шемаров. 2. Михаил Пичугин.
3. Давид Хинчагов.
РЦСПСК «Триумф» пресс-киинэ
