“Роснефть” НХ эдэр исписэлиистэрин ХVI кустовой научнай-тэхиниичэскэй кэмпириэнсийэтигэр “Таас Үрэх Нефтегазодобыча” бэрэстэбиитэллэрэ 9 наҕарааданы ыллылар. Онтон үһэ – бочуоттаах I миэстэ!
“Башнефть-Полюс”, “Тюменнааҕы ньиэп научнай киинэ” уонна “РН – Уватнефтегаз” тэрилтэлэрин түһүлгэтигэр 21 эдэр исписэлиис научнай бырайыактарын билиһиннэрдилэр. Барыта дьүүллүүр сүбэҕэ 19 чинчийиини көмүскээтилэр.
“Башнефть-Полюс” былаһааккатыгар тыҥааһыннаах күрэскэ биэс бырайыак бирииһи ылла: икки бырайыак – I миэстэни, биир үлэ – II миэстэни, икки бырайыак – III миэстэҕэ тигистилэр. Маны таһынан үс научнай улэни дьүүллүүр сүбэ “За актуальный проект”, “Новый взгляд” уонна “Взгляд в будущее” диэн анал ааттарынан бэлиэтээтэ. “ТННЦ” былаһааккатыгар чинчийэр үлэни ыыппыт биир бырайыакка I миэстэни биэрдилэр.
Эдэр исписэлиистэр бырайыактара Орто Ботуобуйатааҕы ньиэбинэн уонна гааһынан баайдаах сиригэр хостооһун, геология, ньиэби бэлэмнээһин, экэниэмикэ уо.д.а. сүрүн суолталаах хайысхаларга олоҕуран инновациялаах быһаарыылары туһанарга ананна.
Эдэр исписэлиис Дмитрий Охлопков “Ломая стереотипы. Иной подход к поисково-разведочному бурению карбонатов” диэн научнай үлэтэ “Ньиэптээх, гаастаах сир геологията” диэн сиэксийэҕэ үһүс миэстэни ылла. Бырайыакка осинскайдааҕы саҕах дьапталҕатын чинчийэргэ ыытыллар сири үүттээһин үлэтигэр альтернативнай ньыманы киллэрэргэ этиилээх.
– Үлэм экономическэй суоттааһынын “Тюменнааҕы ньиэп научнай киинигэр” үлэлиир кэллиэгэбин Анна Андреевнаны кытары оҥорбуппут. Чинчийэр сирбит дапталҕата былыргы кембрийскэй кэминээҕи саастаах. Биһиги быһаарыыбытынан уларыйымтыа коллекторга хостооһун кутталлаах өрүттэрин намтатан уонна коллектор үчүгэй сирдэригэр тиийэргэ кыахтары арыйыахха сөбүн быһаардыбыт. Чинчийбит ньымабыт көдьүүстээҕин сири үүттээһин түмүктэрэ туоһулууллар. Түгэни туһанан научнай салайааччыларбытыгар Алмаз Гаязович Янышевка уонна Евгений Сергеевич Зюзевка улахан махталбытын тиэрдэбит. Ону тэҥэ көмөлөрүн, өйөбүллэрин иһин начаалынньыктарбар Артем Игоревич Будькоҕа уонна Иван Александрович Опариҥҥа махтанабын, – диэн Дмитрий Охлопков санаатын үллэстэр.
Кыайыылаахтар салгыы кэлэр түһүмэххэ – Москубаҕа ыытыллар “Роснефть” эрэгийиэннэр икки ардыларынааҕы научнай-тэхиниичэскэй кэмпириэнсийэтигэр – үлэлэрин көмүскүөхтэрэ. Манна дойду араас муннугуттан эдэр исписэлиистэр түмсүөхтэрэ.
"Таас Үрэх нефетегазодобыча" ХЭТ пресс-сулууспата
