Уонча хонуктааҕыта Хабаровскай кыраай Нелькан сэлиэнньэтин олохтооҕо, удьуор табаһыт Евгения Кармазина көмө көрдүүр видеота тарҕаммыта. Онно кини табаларын (25 төбөнү) кэргэнинээн сааһыран кыайан көрбөт буолбуттарын, ол иһин Саха сиригэр олорор А.К. Ильинов аатынан «Энэси Халан» (Сила Рода) эбэҥки удьуор общинатын салайааччытыгар Раиса Ильиноваҕа бэлэхтиирин туһунан кэпсээбитэ уонна табалары тиэйэн аҕалыыга көмөлөһүҥ диэн көрдөспүтэ.
Бу видео тарҕаммытын кэннэ бар дьон Евгения Николаевна картатыгар 42 тыһ. солкуобайы хомуйан ыыппыттара. Онон, кини кулун тутар 20 күнүгэр Дьокуускайга кэлэн, табаларын саҥа хаһаайкатын көрсүбүтэ, кинини кытта туһааннаах уорганнарга сылдьан кыһалҕатын быһаарсыбыта, Чурапчыга кэргэнин өттүнэн аймахтарын булбута. Үс эрэ күн иһигэр түмүктээх кэпсэтиилэр бараннар, табалары Томмоттон аҕалыыга СӨ Тыа хаһаайыстыбатын министиэристибэтэ, “Биир ньыгыл Арассыыйа” баартыйа көмөлөһөргө сөбүлэспиттэрэ. СӨ Тырааныспар уонна суол хаһаайыстыбатын министиэристибэтэ табалар Дьокуускайга тохтуур сирдэрин оҥорорго көмөлөһүөх буолбута.
Дьиктитэ диэн, соһуччу 25 табаны ылар дьолго тиксибит Раиса Ильинова этэринэн, кини аатырбыт табаһыт эһэтэ Аполлон Ильинов олохтон туоруон иннинэ Саха сирин салалтатыттан экчи 25 табаны көрдөөбүт эбит. Онон, табалар Саха сиригэр ананан кэлиилэригэр Үрдүкү күүстэр уонна Ытык өбүгэлэр кыттыстылар диэн кыыс ис сүрэҕиттэн итэҕэйэр.
"Кындыкаан" бырайыак салайааччыта Илаан Кындыкан иһитиннэрбитинэн, кулун тутар 29 түүнүгэр Раиса Ильинова аҕатынаан Нелькантан табаларын ылан төттөрү айаннаан иһэллэр.Табалары, ону таһынан 8 наартаны, бырысыаптаах “КамАЗ-Сайгак” массыынаҕа тиэйбиттэр. Кинилэри, 2-2,5 күнүнэн этэҥҥэ Томмокко тиийдэхтэринэ, СӨ ТХМ массыыната тоһуйуохтаах.
Былаан быһыытынан, табалары Бүлүү суолугар Раиса Ильинова “Уһук Илиҥҥи гектар” бырагырааманан ылбыт сиригэр илдьэн олохтуохтаахтар. Бу сири Евгения Николаевна кэлэ сылдьан сөбүлээн барбыт сурахтаах. Табалар кэлиэхтэригэр диэри киэҥ сир ыраастанан, күрүөлэнэн, дьиэлэнэн-уоттанан бэлэм буолуохтаах. Онон, үп-харчы хомуйуута билигин да бара турар.
Бэйэ кэр.
