Биһиги кыра куораппытыгар хоруона-вируһуттан сылтаан, улахан араллаан, куттал, ”Һуу-Һаа” буолуу соччо көстүбэт. Дьон холкулар.
МФЦ муус устар ый саҥатыгар диэри сабыллыбыта. Бааннар эбиэт кэнниттэн ааннара хатыылаах. Биир да киинэ тыйаатыра, успуорт куруһуога, эрчиллэр саалалар үлэлээбэттэр.
Ыччат сөбүлээн сылдьар “Травеллерс” кафе сабыллыбыт. МРТК уочарата суох сынньалаҥҥа баран турар. Мииринэйдээҕи политехническай институт олбуоругар аҕыйах массыына көстөр. Московскай уонна Солдатов уулуссаларга баар уопсайдар аттыларыгар устудьуоннар төрүт көстүбэттэр. Ким бэйэтин улууһугар барбыт, ким уопсайга хоһугар олорон үөрэнэр. Куорат ырыынага бэнидиэнньиккэ эрэ өрүүр, атын күннэргэ үлэлиир. Сылдьааччы киһи баһаам. “АЛРОСА” Эмтиир киинэ тохтобулга барда. “Горняк” санаторий-профилакторий үлэлээбэт.
Оттон Мииринэй аэропуордуттан соҕурууҥҥу эрэгэйиэннэри кытары сырыы тохтотуллубата. Холобур, Москубаттан, Новосибирскайтан, Иркутскайтан дьон кэлбитин курдук кэлэ тураллар. Олору “Роспотребнадзор” уонна МЦРБ эмчиттэрэ бэрэбиэркэлииллэр. Удачнай аэропуордугар көтөн кэлбит дьону тепловизор көмөтүнэн бэрэбиэркэлиир буоллахтарына, Мииринэй аэробаксаалыгар маннык тэриэбэни бу нэдиэлэ бүтэһигиттэн үлэлэтиэхтээхтэр.
Куорат маҕаһыыннара үлэлээбиттэрин курдук үлэлии тураллар. Арай, эрэстэрээннэр, дьону сынньатар, аһыы утаҕы атыылыыр тэрилтэлэр, Ил Дархан тус дьаһалынан чопчу кэмҥэ сабылыннылар. Холобур, “Старый двор”, “Империал” курдуктар. Оттон арыгы маҕаһыыннара күн бэҕэһээҥҥи диэри үлэлиир турбуттара. Кинилэр эмиэ аналлаах дьаһалынан чопчу кэмҥэ сабыллыахтаахтар. Куорат устун дьаарбайааччы улаханнык аҕыйыы илик. Эбиэт кэннэ сорох уулуссаларга туруоруллубут араадьыйа тэриэбэлэрэ норуоту сэрэтэллэр: “Улахан наадата суох таһырдьа быгыалаамаҥ, дьиэҕитигэр олоруҥ”. Ону бэрт ахсааннаах киһи тутуһар эбит.
Эбэн эттэххэ, кулун тутар ый саҥатыттан бүтэһигэр диэри, быһа холуйан 700-чэ киһи Орто Азияттан кэлбит. Бу дьонтон баһыйар үгүстэрэ соҕурууттан кэлбиттэрин эбэтэр омук дойдуларыгар сылдьыбыттарын туһунан биллэрдилэр, бэрэбиэркэни аастылар. Билигин Мииринэй оройуоннааҕы балыыһатын эмчиттэрэ, Дьокуускайтан кэлбит медик устудьуоннар, дьиэлэри кэрийэ сылдьан, соҕурууттан кэлбит дьону бэрэбиэркэлииллэр. Балтараа сүүс киһи ханна сылдьара биллибэт диэн буолла. Мииринэй оройуоннаааҕы балыыһа иһитиннэрбитинэн, 50 куойка уонна ИВЛ аппарааттара, тестердэр бэлэмнэр. Дьэ, ити курдук балаһыанньа. Барыта этэҥҥэ буоллун эрэ.
Станислав Алексеев. Мииринэй куората.
