Быйыл Арассыыйаҕа дойду бэрэсидьиэнин ыйааҕынан Билим уонна технология сыла биллэриллибитэ. Оттон бүгүн, олунньу 8 күнүгэр, Арассыыйаҕа Билим күнэ бэлиэтэнэр.
Онон сибээстээн, РАН Сибиирдээҕи салаатын Саха сиринээҕи билим киинигэр (ЯНЦ СО РАН) үөрүүлээх мунньах ыытылынна. Эҕэрдэ тылларын бырабыыталыстыба бэрэссэдээтэлэ Андрей Тарасенко, РАН академига, Сибиирдээҕи салаа сүрүннүүр учуонай сэкэрэтээрэ Дмитрий Маркович, үөрэх миниистирэ Михаил Сивцев уонна ЯНЦ бэрэссэдээтэлэ Михаил Лебедев эттилэр. Андрей Тарасенко билим эйгэтигэр 200 мөл. солк. бырабыыталыстыба тыырбытын кэпсээтэ. "Саха учуонайдарын арыйыылара өрөспүүбүлкэ сайдыытыгар төһүү буолаллар. Онон биһиги билими өйүүрбүт - кэм ирдэбилэ. Билигин Япония билими, технологияны сайынннаран муҥутуурдук кыаҕырда. Кинилэр таас чоҕу, ууну, гааһы туһанан, саҥа технологияны айан таһааран водороду ылар кыахтаммыттар. Оттон ити сир баайа барыта биһиэхэ баар ээ. Ону биһиги быыкаа сыанаҕа атыылыыбыт. Онон газохимия өттүгэр күүскэ үлэлэһиэхпитин наада. Биһиги Саха сиригэр аччыгый атомнай энергетиканы аҕалаары гынабыт. Атомнай ыстаансыйа изотоптары чинчийэргэ кыаҕы биэриэ уонна изотоптан туһалаах хостонор баайы ылар кыаҕы биэрэр", - диэн премьер Тарасенко эппит.
— 2021 сыл биһиги иннибитигэр билим-тиэхиньикэ сайдыытыгар саҥа саҕахтары арыйар, ураты көрүүлэри ирдиир. Быйыл дойдуга Билим уонна технология сыла биллэрилиннэ. Онон бу эйгэ үлэһиттэриттэн элбэх саҥа арыйыылары кэтэһэбит, үөрэх сайдыытын, технологиялар тоҕо анньан тахсалларын күүтэбит, - диэн Дмитрий Маркович тоһоҕолоото.
Үөрүүлээх мунньах кэмигэр билим эйгэтин үлэһиттэригэр наҕараадалар туттарылыннылар.
