Ил Дархан сарсыардааҥҥы брифинигэр өрөспүүбүлүкэҕэ хоруона хамсыгын тула эпидемиологическэй балаһыанньаны билиһиннэрдэ.
Кини этэринэн, ааспыт суукка устатыгар Саха сиригэр эбии 53 коронавирустаабыт киһини булбуттар. Олортон 39 ыарыһах – Дьокуускайга. Маны таһынан, хоруона хамсыга Үөһээ Бүлүү, Дьааҥы, Кэбээйи, Ленскэй, Мэҥэ Хаҥалас уонна Чурапчы улуустарыгар эбии бэлиэтэммит. Ыалдьыбыт дьону булан балыыһаҕа укпуттар, алтыспыт дьонун ылан анаалыстаабыттар уонна изоляцияҕа ыыппыттар. Билигин Саха сиригэр 1200 кэриҥэ киһи бу дьаҥтан эмтэнэр, олортон аҥардара – тастан эмтэнэллэр. Дьиэлэриттэн эмтэнэр ыарыһахтарга эми-тому босхо көрөллөр. Билигин 26 киһи ыарахан туруктаах сытар, элбэх киһи ИВЛ аппараатыгар холбоммут. Икки киһи суорума суолламмыт.
Бу нэдиэлэҕэ хамсыгы бохсор Суһал штаб кэлэр үөрэх дьыла хайдах саҕаланарын чопчулаан мунньахтыаҕа диэн Айсен Николаев эттэ. Маны таһынан, баһылык диспансеризация, балыыһаларга былааннаах киллэрии, көрдөрүнүү тула элбэх мунаарыы нэһилиэнньэттэн киирэрин эттэ. Онуоха кини билигин стационардарга миэстэ тахсыбытынан, уопсайынан доруобуйа харыстабылын систиэмэтэ хамсык усчулуобуйатыгар бэлэм буолбутунан сибээстээн, аныгыскы нэдиэлэттэн былааннаах госпитализация уонна диспансеризация сөргүтүллүөн сөбүн эттэ.
