Бэҕэһээ, атырдьах ыйын 25 күнүгэр, Саха сирин историктарын уонна кыраайы үөрэтээччилэр түмсүүлэрин көҕүлээһининэн, СӨ Наукаларын Академиятын аактабай саалатыгар 1-кы гильдиялаах аатырбыт атыыһыт Петр Акепсимович Кушнарев сиэнин, Иркутскайтан кэлэ сылдьар устуоруйа дуоктара Маргарита Дмитриевна Кушнареваны кытта көрсүһүү буолан ааста.
Көрсүһүүгэ сылдьыбыт суруналыыс Нина Герасимова санаатын үллэһиннэ: «Кыыс өтөрү-батары көрөн, чиҥник, кытаанахтык саҥаран, чопчу быһаарыылары биэрэн, чахчы, атыыһыттар сыдьааннара буолара көстөр. Саха сирин атыыһыттара сүрдээх дьон олорон ааспыттар эбит. Билиҥҥи "олигархтар" эҥин кинилэр тарбахтарыгар да тиийбэт дьон эбит диэн биир истээччи түмүктээтэ. Кушнарев - старообрядец. Ол итэҕэлин кини тиһэҕэр тиийэ илдьэ сылдьыбыт. Ол да иһин, дьиҥ итэҕэллээх буолан, дьон, олохтоохтор тустарыгар кыһаллан үлэ бөҕөнү ыыппыта биллэр. Көрсүһүү видеота ютубка тахсыа диэтилэр».
Кушнаревтар тустарынан кылгастык:
Кушнаревтар Павловскайга олорбуттара. Акепсим Кушнарев эргинэн байбыта. Кыыһа Агриппина, уола Петр, кини дьыалатын салҕаан, уһулуччу байан-тайан турбуттара. "Уһуктуу" ромаҥҥа Болот Боотур Агриппинаны уобараһын үчүгэй өттүнэн олус итэҕэтиилээхтик арыйбыта.
Гражданскай сэрии кэнниттэн нуучча да, саха да баайдара, үрүҥҥэ сылдьыбыт интеллигенция Японияҕа эмиграциялаабыта. Харысхал суруйбутунан, ити кэмҥэ дьоппуон анал сулууспалара үрүҥ эмиграннарга аһара кырыктаахтык сыһыаннаһан барбыттарыгар, Петр Акепсимович бүтүн борокуоту наймылаһан Харбиҥҥа күрэппитэ диэн баар.