Дьокуускай куорат айдааннаах 17-с кыбаарталыгар саҥа «Спортивнай» түөлбэ бастакы 12 этээстээх дьиэтин сыбаайата түстэ.
Тэрээһиҥҥэ СӨ Бырабыыталыстыбатын бэрэссэдээтэлин бастакы солбуйааччыта Кирилл Бычков, Дьокуускай куорат баһылыга Евгений Григорьев, ОНФ олохтоох салаатын бэрэссэдээтэлэ Дмитрий Паньков, «Өрөспүүбүлүкэтээҕи успуорт эрэллэрин бэлэмниир киин» дириэктэрэ Василий Егоров, «РИА» генеральнай дириэктэрэ Владимир Трегубов уонна да атыттар кытыннылар.
«Бу түгэни бары олус кэтэспиппит. Бүгүн саҥа түөлбэ бастакы олорор дьиэтин сыбаайата түстэ. Бу дьиэ 2025 сылга, оттон 161 дьиэ 2032 сылга диэри үлэҕэ киириэхтэрэ. Маны таһынан, эмиэ бу сылга элбэх хайысхалаах успуорт комплексын уонна 315 миэстэлээх уһуйаан дьиэтин тутуу саҕаланыа», – диэн Кирилл Бычков эрэннэрдэ.
Санатар буоллахха, «Спортивнай» түөлбэ барыта 53,16 га иэннээх сири ылыахтаах. Манна 46 элбэх этээстээх олорор дьиэ, 2 уһуйаан, 2 оскуола, элбэх хайысхалаах успуорт комплекса, гостиница, 8 этээстээх парковка, воркаут-былаһааккалар тутуллуохтара.
Тутар боломуочуйалаах тэрилтэнэн «Өрөспүүбүлүкэтээҕи ипотека ааҕыныстыбата» (АО СЗ «РИА») анаммыта. Бырайыак болдьоҕо - 10 сыл.
Сонун төрдө: СӨ Бырабыыталыстыбатын уонна Ил Дарханын пресс-сулууспата
Хаартыска: Андрей Сорокин, ЯСИА
