М.А. Алексеев аатынан ХХХ “Туймаада” олимпиада бүгүн, от ыйын 10 күнүгэр, үлэтин түмүктүүр.
“Киэһэ 17:00 чааска кыайыылаахтар ааттара биллиэҕэ” диэн СӨ Дьоҕус билим академиятын пресс-сулууспата иһитиннэрэр.
Олимпиада чэрчитинэн, нэдиэлэ иһигэр өрөспүүбүлүкэ араас муннуктарыттан, Арассыыйа атын эрэгийиэннэриттэн, аан дойду атын муннуктарыттан кэлбит 200 үөрэнээччи математика, физика уонна информатика садаачаларын суоттаатылар.
Олимпиада туһунан санаатын РФ норуодунай учуутала, физикаҕа дьүүллүүр сүбэ чилиэнэ Виктор Потапов үллэһиннэ.
“Быйыл физика олимпиадата сирэй көрсөн олорон ыытылынна. Маннык олимпиадаҕа кыттааччылар бэйэ-бэйэлэрин кытта билсэн, кэпсэтэн хаалаллара улахан суолталаах. Бэйэ кэлэн кыттар буолан, кыттааччы ахсаана соччо элбэҕэ суох буолла: улахаттар бөлөхтөрүгэр 15, кыраларга 10 үөрэнээччи. Үгэс курдук, Татарстан уонна Новосибирскай үөрэнээччилэрэ күүстээхтэрин көрдөрдүлэр, биһиэттэрэ даҕаны бэйэлэрин кыахтарынан кытыннылар. Ол түмүгүнэн, улахан бөлөххө Ефимов Степа үрүҥ көмүһү ылла уонна Христофоров Виталий эспэримиэҥҥэ анал бирииһи тутта. Онтон кыра бөлөххө Решетников Ньургун боруонсаны ситистэ, Миндаев Эльдар кырааматанан наҕараадаланна".
Виктор Потапов оҕолорго инникитин даҕаны элбэҕи үөрэтэллэригэр, чинчийэллэригэр уонна үрдүктэн үрдүк сыалларын ситиһэллэригэр баҕарда.
Санатар буоллахха, Виктор Филиппович Потапов былырыын сахалартан бастакынан “РФ норуодунай учуутала” ааты ылбыта. Өрөспүүбүлүкэ баһылыга Айсен Николаев учуутала.
ССРС норуодунай учуутала, уһулуччулаах педагог Михаил Андреевич Алексеев үөрэнээччитэ уонна соратнига, үрдүк квалификациялаах педагог Виктор Филиппович Потапов “Туймаада” норуоттар икки ардыларынааҕы үөрэнээччилэр олимпиадаларын тэрийээччилэртэн биирдэстэрэ. 1996 с. Өрөспүүбүлүкэтээҕи лиссиэйгэ физика учууталынан үлэлиир. Идэтинэн үлэлээбит сыла -- 45.
СӨ Ил Дарханын уонна Бырабыыталыстыбатын пресс-сулууспата.
