Ыам ыйын 7 күнүгэр Өксөкүлээх Өлөксөй аатынан норуоттар доҕордоһууларын дьиэтигэр «Умнуллубат ол кустук» диэн «Махтал» ансаамбыл кэнсиэрэ буолан ааста. Тэрээһин бөлөҕү тэрийээччилэртэн биирдэстэрэ, суруналыыс, успуорт кэмэнтээтэригэр Иннокентий Птицын сырдык кэриэһигэр ананна. Кини Саха сиригэр успуорду киэҥник тарҕатааччы дьонтон биирдэстэрэ этэ, өрөспүүбүлүкэҕэ чэпчэки атлетиканы, сахалыы ойуулары, оҕунан ытыынын, оҕо успуордун тарҕатыынан дьарыктаммыта. Маны сэргэ, хас даҕаны кинигэ ааптара, талааннаах ырыа толорооччу, тойуксут. Кинини успуорт хаама сылдьар энциклопедиятынан ааттыыллар этэ. Иннокентий Птицын киэҥ көҕүстээх, үрдүк култууралаах буолан, дьон-сэргэ өйүгэр-санаатыгар, дьылҕатыгар үтүө суолу хаалларбыт киһинэн буолар.
2015 сыллаахха, Екатерина Новикова-Дьулууралыын Иннокентий Птицын «Төрүт эйгэ» диэн саха норуотун түмсүүтүн төрүттээбиттэрэ, ол сыл бөлөх иһинэн «Махтал» үҥкүү ансаамбыла төрүттэммитэ. Тохтуу түһэн баран, «Дабайа Дайа» уонна «Олоҥхо аартыгынан» фольклорнай бөлөхтөр төрүттэммиттэрэ.
«Махтал» ансаамбыл хас даҕаны норуоттар икки ардыларынааҕы, Арассыыйатааҕы уонна өрөспүүбүлүкэтээҕи куонкурустар кыайыылаахтара, кыттыылаахтара. Ансаамбыл чилиэннэрэ Иннокентий Иннокентьевич сырдык кэриэһигэр, кинини ытыктаан уонна таптаан туран, үтүө тэрээһини ыыттылар. Хас биирдии кэнсиэр нүөмэрэ киһи дууһатын кылын таарыйда.
Кэнсиэргэ «Дабайа Дайа» фольклорнай бөлөх, «Арыллыы» эр дьон ансаамбыла уонна «Далбар» Арчы Дьиэтин норуодунай ансаамбыла кыттыыны ыллылар.
Өксөкүлээх Өлөксөй аатынан норуоттар доҕордоһууларын дьиэтин пресс-сулууспата сырдатыытыттан
