China Overseas Holding Group Smarter City Fund Co. Ltd бэрэстэбиитэллэр бу күннэргэ Дьокуускайга кэллилэр. Кинилэр Дьокуускайга улахан отель тутуутун үөрэтэллэр. Инвестиция кээмэйэ – 1 млрд солк. Бырайыагы тутааччынан EKSI Group диэн туурактар хампаанньалара дьарыктанар былааннаах.
Дьокуускай баһылыга Айсен Николаев Саха сирин инвестициялаах сайдыытын ааҕыныстыбата, киин куорат, инвестор уонна тутааччы бииргэ үлэлэһэргэ сананалларын туһунан меморандум баттаһыллыбытын эттэ. «China Overseas Holding Group Smarter City Fund Co. Ltd уонна EKSI Group бу улахан отелы тутарга улахан интэриэстээхтэрин биллэрбиттэр. Маны таһынан, Соҕуруу Кэриэйэ уонна Турция инвестордара эмиэ интэриэстээхтэрин биллэрбиттэр. Кытай инвестордарын кытары кэпсэтиини өрөспүүбүлүкэ Инвестициялаах сайдыытын уонна урбааҥҥа министиэристибэтэ ыыта сылдьар. Бу бырайыакка судаарыстыба харчы угар былаана суох, бырйыак бүтүннүү инвестор харчытыгар тутуллуохтаах.
Отель куорат киинигэр килбэйиэхтээх. “Бырайыак олоххо киирэр түгэнигэр, отелы үлэлэтиигэ аан дойдуга киэҥник тарҕаммыт франшизалар – Hilton World Widе уонна Accor hotels ылсар баҕалаахтар”, - диэн Айсен Николаев иһитиннэрэр.
Санатар буоллахха, Саха сирин былаастара кытай инвестордарын кытары улахан бырайыактары үлэҕэ киллэрэ сатаабыттара син балай эмэ буолла. 2015 сылтан ыла SynoGydro Corporation Limited диэн судаарыстыбаннай корпорацияны кытары Өлүөнэ өрүскэ күргэни туттара сатыыллар (бырйыак барыллаан сыаната – 55-64 млрд солк.). Маныаха, Кытай инвестордара РФ Бырабыыталыстыбатын кытары концессионнай сөбүлэҥ баар буоллаҕына биирдэ ылсар санаалаахтар. Ити Сөбүлэҥи баттастахтарына, күргэни тутуу “2020 сылга диэри Арассыыйа тырааныспарын ситимин сайыннарыы” федеральнай бырагыраамаҕа киириэхтээх.
Маны таһынан, куорат дьаһалтата уонна Кытай Zhuoda инвестициялыыр хампаанньата Дьокуускай үс кыбаарталын тутууга 40 млрд солк. суумалаах дуогабары түһэрсибиттэрэ. 2016 сыл муус устарыгар үөрүүлээх быһыыга-майгыга бастакы сыбаайалары түһэрбиттэрэ да, күн бүгүн тутуу ыытыллыбакка турар.
