Бэҕэһээ, атырдьах ыйын 16 күнүгэр Сунтаар сэлиэнньэтигэр 13 саастаах оҕо 11 саастаах уолу алҕаска cаанан ытан өлөрбүт. Хомойуох иһин, уол тута миэстэтигэр сырдык тыына быстыбыт.
Арассыыйа Силиэстийэлиир кэмитиэтин Саха сиринээҕи управлениетын салайааччытын СМИни кытары үлэҕэ ыстаарсай көмөлөһөөччүтэ Надежда Дворецкая маннык быһылаан тахсыбытын бигэргэттэ:
-- Бэҕэһээ, атырдьах ыйын 16 күнүгэр, киэһэ 18-19 ч. икки ардыгар 13 уонна 11 саастаах уолаттар Сунтаар сэлиэнньэтигэр баар көлө анал ыстыраап стоянкатыгар киирэн оонньуу сылдьыбыттар. Ыстыраапка тутуллубут биир аһаҕас массыынаттан саа баарын көрбүттэр уонна 13 саастаах оҕо ону ылан алҕаска 11 саастаах табаарыһын туһаайыытынан ыппыт. Хомойуох иһин, эмсэҕэлээччи сонно тута өлбүт. Билигин миэстэтигэр силиэдэбэтэллэр үлэлииллэр, ол кэннэ процессуальнай быһаарыыны ылыахтара.
-- Ол ГАИ стоянката дуо? Ким да көрбөт-манаабат эбит дуу?
-- Ити туһунан билигин чопчу этэр кыаҕым суох. Ити стоянкаҕа ГАИ ыстырааптаммыт массыынаны аҕалан уурар. Сөптөөх харабыллаах эбитэ буоллар, маннык быһылаан тахсыа суохтаах этэ. Туох да диэбит иһин, билигин силиэдэбэтэллэр сиһилии сыныйан баран, буруйдаахтары быһаарыахтара.
Kyym.ru
