Бэтэринээр олус наадалаах идэ. Киһи аймах бырааһа, эмчитэ суох табыллыбатын тэҥэ дьиэ сүөһүтэ, көтөрө бэтэринээрэ суох сатаммат. Буолан баран, аныгы кэмҥэ. Бүтүн аан дойду үрдүнэн сыстыганнаах ыарыы элбэҕэ, быыһыгар киһи үөйбэтэх-ахтыбатах ыарыылара өрө тураллара, ханна барыай? Кыраныысса да сабылыннаҕына, көтөр-сүүрэр сырыытын-айанын хайдах да “хам хаайбаккын”. Онон ыарыы кэлэр куттала өрүү да улахан.
Оттон аһааҕырбыт, ыалдьыбыт сүөһүттэн, сылгыттан, сибиинньэттэн хайдах да элбэх бородууксуйаны ылбаккын. Ол эрэ буолуо дуо, сотуун, бүрүсүлүөс курдук ыарыы саба бүрүүкээтэҕинэ букатын да баар-суох баайтан ытыс соттуохха, ыарыыга сыстан буорайыахха сөп. Онон ыарыыны эрдэттэн сэрэтэр, уодьуганныыр, эпизоотическай уонна бэтэринээринэй-санитарнай турук үтүө буоларын туһугар тиһиктээх үлэ ыытыллыахтаах. Онуоха ыраастыыр-дезинфекциялыыр тэрил, судургутун ыллахха, ыарыы турбут сиригэр айаннаан тиийэргэ да көлө наада.
Туох кистэлэй, биһиги бэтэринээр сулууспабыт автопаарката 20-тэн тахса сыл саҥардыллыбакка турбута. Бэтэринээр сулууспатын салайа кэлэн баран, Петр Петров бу кыһалҕаны быһаарарга үгүстүк туруорсубута. Олохтоох бырабыыталыстыба былырыын от ыйын 2 күнүгэр 445-р нүөмэрдээх «О финансировании приобретения специализированной техники для нужд государственных бюджетных учреждений ветеринарии в рамках заключения долгосрочного контракта лизинга на 2023-2028 годы» күүтүүлээх уурааҕы таһаарбыта. Ол түмүгэр СӨ бэтэринээр сулууспата лизинг төрүтүгэр 22 улуус бэтэринээрдэрин управлениетыгар ВДУ-2 диэн дезинфекциялыыр тэриллээх УАЗ массыынаны атыылаһар кыахтанна.
Билиҥҥитэ ханнык улуустар хааччылыннылар диир буоллахха: Алдан, Амма, Үөһээ Бүлүү, Бүлүү, Үөһээ Дьааҥы, Горнай, Кэбээйи, Ленскэй, Мэҥэ Хаҥалас, Мииринэй, Нам, Нерюнгри, Ньурба, Өймөкөөн, Өлүөхүмэ, Сунтаар, Таатта, Томпо, Хаҥалас, Уус Алдан, Чурапчы улуустара уонна Дьокуускай.
Бу саҥа тэрили тыа хаһаайыстыбатын кыылларын санитарнай ыраастааһыҥҥа эрэ буолбакка, сүөһүнү иитии салаатын тэрээһиннэрин кэмигэр, астыыр-үөллүүр тэрилтэлэри, ырыынактары, ыскылааттары дезинфекциялыырга эмиэ туһаныахтара. О.э, нэһилиэнньэ кыылга-сүөлгэ, ону таһынан киһиэхэ кутталлаах ыарыыттан көмүскэллээх буолуутун үрдэтэргэ туһалаах дьаһал олоххо киирдэ.
Ыраастыыр тэриллээх массыыналар күлүүстэрин туттарыы дьоро түгэнэ кулун тутар 29 күнүгэр, Дьокуускай куорат Хомсомуол болуоссатыгар буолбута.
Бэлиэ тэрээһиҥҥэ СӨ Ил Дархана Айсен Николаев, үп миниистирин солбуйааччы Николай Старостин, «СӨ атыы-тутуу киинэ» ГКУ туһааннаах салаатын начаалынньыга Александр Тихонов, исписэлииһэ Станислав Дегтярёв, Управляющий Якутским отделением ПАО «Сбербаан-лизинг» ПАО Саха сиринээҕи отделениетын салайааччыта Олег Бугай, АГАТУ билим үлэтигэр уонна инновацияҕа проректора Константин Нифонтов, Туймаада» Агрохолдинг генеральнай дириэктэрин солбуйааччыта Алексей Гуляев, СӨ бэтэринээр исписэлиистэрин Ассоциациятын бэрэссэдээтэлэ Афанасий Аргунов кыттыбыттара.
СӨ бэтэринээр управлениетын салайааччытын э.т. Петр Петров кэлбит дьоҥҥо анал тиэхиньикэни билиһиннэрбитэ. Массыыналаммыттар ааттарыттан харда тылы Алдан улууһун бэтэринээр-испытательнай лабораториялаах бэтэринээр управлениетын салайааччыта Сергей Силецкэй эппитэ.
Татьяна Захарова-ЛОҺУУРА.
