Үгэс буолбут Үөрэх үлэһиттэрин Атырдьах ыйынааҕы сүбэ мунньаҕар атырдьах ыйын 22-25 күннэригэр 400 киһи кэлэн кытта сылдьар. Манна, үөрэх тэрилтэлэрин салайааччыларын, үлэһиттэрин таһынан, төрөппүттэр, уопсастыбанньыктар уонна федеральнай эспиэрдэр бааллар. Кыайан кэлбэт дьоҥҥо онлайн-трансляциялары тэрийэллэр.
Сүбэ мунньах тутаах тэрээһинэ – «Система образования: вызовы и векторы развития» диэн пленарнай мунньах атырдьах ыйын 23 күнүгэр «Сэргэлээх уоттара» култуура киинигэр буолуоҕа. Кэпсэтии сүрүн тиэмэтэ – «Биир кэлим үөрэх эйгэтин тэрийии». Манна Ил Дархан Айсен Николаев педагогтар иннилэригэр саҥа соруктары туруоруоҕа.
Салгыы үөрэх сайдыытын тыҥаан турар боппуруостарын туспа былааһааккаларга ырытыахтара. Тэрээһин чэрчитинэн Дьокуускай килииникэлэригэр педагогтарга экспресс-диагностика оҥоруохтара. Маны сэргэ «Школьная археология Якутии: новый уровень» диэн сатыы экскурсияны тэрийиэхтэрэ.
Атырдьах ыйынааҕы сүбэ мунньах устуоруйатыгар аан бастакытын Өрөспүүбүлүкэ үөрэҕириитин тэрилтэлэрин үлэһиттэрин спартакиадата буолуоҕа. Күрэхтэһии торумугар успуорт сэттэ көрүҥэ: нуучча шашката, саахымат, төрүт остуол оонньуулара (хабылык, хаамыска), волейбол, электроннай сэрии сэбинэн ытыы, остуол тенниһэ уонна ханааты тардыһыы киирдилэр.
Сонун төрдө: СӨ Бырабыыталыстыбатын уонна Ил Дарханын пресс-сулууспата