Аан дойду норуоттарын хомустарын киинэ уонна түмэлэ “Хомус диктанын” тэрийэн ыыппыт. Онно 7160 киһи кыттыбыт.
Былырыын 1300 киһи кыттыбыта, Саха сиригэр 67 былаһаакка тэриллибитэ. Оттон быйыл хамсыгынан сибээстээн онлайн ыытыллыбыт, инньэ гынан кыттааччы ахсаана быдан элбээбит. Быйылгы диктаҥҥа Украина, АХШ, Чехия, Италия, Казахстан, Британия, Япония курдук дойдулартан кыттыбыттар. Маны таһынан, биир кыттааччы Новай Зеландияттан кыттыбыт.
“Быйыл биһиги онлайн уонна офлайн ньыманнан ыытаары сылдьыбыппыт, ол эрээри хамсыгынан сылтаан дистанционнай ньыманнан эрэ барда. Кыттааччылар 20 ыйытыкка хоруйдаатылар. 6 бырыһыан кыттааччы “туйгун” сыанаҕа толордо. Уопсайынан ыллахха, диктаны куһаҕана суохтук толордулар, биһиги онтон олус астынныбыт”, - диэн Хомус түмэлин учуонай сэкэрэтээрэ Эркин Васильев кэпсээтэ.
