Саха сиригэр 2024 сыл бастакы үс ыйыгар буруйу оҥоруу, сокуону кэһии “хартыыната” хайдаҕый? СӨ борокуратуурата бэлиэтииринэн, ааспыт үс ый иһигэр өрөспүүбүлүкэ үрдүнэн барыта 2807 буруйу оҥоруу бэлиэтэммит. Онтон баһыйар үксэ, 48,3 %-на, бас билиигэ суудайыыны кытта ситимнээх. Судургутук эттэххэ – уоруу, түөкүннээһин, массыынаны күрэтии, халааһын уо.д.а.
Ол гынан баран, ааспыт сыл бастакы кыбаарталын кытта тэҥнээтэххэ, буруйу оҥоруу 7,8 бырыһыанынан аҕыйаабыт (былырыын 3046 этэ). 2807 буруйтан 526 буруйун уопсастыбаннай сиргэ оҥорбуттар, ол иһигэр 322 буруйу – уулуссаҕа. Онтон 661 буруй арыгы иһиини кытта ыкса ситимнээх. Ол эрээри, ити көрдөрүү ааспыт сыллааҕыттан 8,8 бырыһыанынан аҕыйаабыт. Былырыын 725 эбитэ үһү.
Саамай элбэх буруйу (55 %) Дьокуускай куоракка оҥорбуттар. Ол курдук, тохсунньу 1 күнүттэн кулун тутар 31 күнүгэр диэри онно 1545 сокуону кэһии тахсыбыт. Уопсайынан, буруйу оҥоруу Саха сирин аҕыс куоратыгар уонна улууһугар эбиллибит, 27 муниципальнай тэриллиигэ – көҕүрээбит.
Итини сэргэ 2024 сыл бастакы кыбаарталыгар ыар (12,9 %-нан) уонна ураты ыар (16,9 %-нан) буруйу оҥоруу көрдөрүүтэ түспүт. 23 киһини өлөрүү, ону тэҥэ 19 өлүүгэ тиэрдибит ыар эчэйиини оҥоруу бэлиэтэммит.
1357 бас билиигэ суудайыыттан уоруута – 622, түөкүннээһинэ – 568, иҥэриниитэ уонна туттуута (присвоение и растрата) – 35, ороспуойдааһына – 5, халааһына – 27, тиэхиньикэни күрэтиитэ – 43, күүһүнэн өттөйөн талааһына – 12. Былырыын баччаларга бас билиигэ суудайыы көрдөрүүтэ 1439 этэ.
Аныгы технологияны уонна көмпүүтэри туһанан буруйу оҥоруу көрдөрүүтэ 13,8 %-нан эбиллибит. Былырыын бастакы кыбаарталга 682 буоллаҕына, быйыл 776 буолбут.
220 экэнэмиичэскэй уонна 68 хоруупсуйалыы хайысхалаах буруйдар арыллыбыттар. 108 сокуоннайа суохтук наркотигы эргиниини кытта сыһыаннаах буруйу бохсубуттар. Ол иһигэр 54 ураты ыар буруйу.
РФ Холуобунай кодексын 264 ыстатыйатын (ПДД кэһии) кэһии иһин 37 буруйу оҥоруу бэлиэтэммит. 67 киһи итирэн баран иккиһин массыына ыытан тутуллубут.
