Муус устар 8-15 күннэригэр Аллараа Халыма улууһугар Илиҥҥи-Сибиир муора кытылыгар, “Медвежий патруль” диэн Арассыыйатааҕы WWF бырайыак чэрчитинэн үрүҥ эһэлэри үөрэттилэр. Бу туһунан СӨ экология министиэристибэтин пресс-сулууспата иһитиннэрэр.
Патрульнай бөлөххө үрдүкү госинспектор Руслан Слепцов уонна госинспектор Вячеслав Слепцов үлэлээтилэр. Кэтээн көрүү кэмигэр эһэлэр суолларынан аҕыс арҕах, 14 улахан эһэ уонна 11 эһэ оҕото баара бэлиэтэннэ. Руслан Слепцов кэпсииринэн, эһэлэр аччык буолбатахтар, инньэ гынан дьоҥҥо кутталы үөскэппэттэр.
Үрүҥ эһэ Арассыыйа уонна Саха сирин кыһыл кинигэтигэр киирбитэ.
