“Кыымҥа” Нам улууһун салалтатыгар туһаайыллыбыт итинник ис хоһоонноох, улуус 8 нэһилиэгин 568 олохтооҕо илии баттаабыт аһаҕас суруга кэллэ. “Биэрбиппит ый буолла да, нэһилиэнньэни долгутар, дьиксиннэрэр бу боппуруоска туох да харда, быһаарыы биэрэ иликтэр” дииллэр. Улуус баһылыгын приёмнайа “суругу 36-с №-дээн 2026 с. бэс ыйын 15 күнүгэр туттубут” диэн суруктаах.
АҺАҺАС СУРУК
«Нам улууһа» МТ баһылыга Ю.И. Слепцовка, Нам улууһун дьокутааттарын Сэбиэтин бэрэссэдээтэлэ А.И. Винокуровка, «Ленскэй нэһилиэк» ТСТ баһылыга П.Г. Сокольниковка.
Нам сэлиэнньэтигэр арыгы атыылыыр саҥа маҕаһыын уонна арыгы иһэрдэр кафелаах, дьону сынньатар, аралдьытар улахан киин аһыллар буолбутуттан Нам улууһун дьоно-сэргэтэ улаханнык соһуйдубут, долгуйдубут, хомойдубут. Олор аһыллыа суохтаахтар. Ол иһин аһаҕас сурук суруйдубут. Арыгы атыытын элбэтэр киини тутууну утарар сүрүн биричиинэбит:
1. Нам – Салбаҥ суолугар 1936 кв. м. иэннээх сири ылаары хайа эрэ тэрилтэ үлэлэһэ сылдьар. Геоинформационнай порталга Саха сирин кадастровай картатыгар көстөрүнэн, сирдэрин миэстэтин булбуттар, талбыттар, быһаарбыттар, кадастровай былаанын оҥорторбуттар.
2. Киин дьиэлэрин тутууга элбэх үп туттуллар. Ону үлэлэтэргэ: нолуоктара, элэктэриичэстибэ уота, дьиэлэрин ититии, үлэһиттэр уонна харабыллар хамнастара, араас хаһаайыстыбаннай, о.д.а. ороскуоттара улахан буолуоҕа.
3. Бу ороскуоттарын сабарга уонна барыс ыларга элбэх киһи кииҥҥэ сылдьарын ситиһэргэ дьулуһуохтара. Манна саастаах дьон уонна арыгыһыттар сылдьыбаттара сэрэйиллэр. Сүрүн сыаллара – ыччаты киэҥник тардыы, элбэхтик сылдьалларын ситиһии. Ол туһугар араас элбэх тэрээһини оҥоруохтара, үнкүү тэрийиэхтэрэ. Сыыйа арыгы иһээччи, табах тардааччы да үксүө, араас венерическэй ыарыыга да сутуллуу элбиэ, наркотигы да тарҕатар дьон баар буолуохтарын сөп. Ыччаты куһаҕан дьаллыкка тардыахтара, ол олох сатарыйыытыгар тиэрдиэҕэ.
4. Билигин улуус дьоно “эдэр ыччаппыт арыгылаабат, табахтаабат, успуорка дьрыктанар, үчүгэй бэрээдэктээх”, – диэн үөрэ саныыбыт, кэпсэтэбит. Ити – улууспутугар ыччакка ыытыллар бэлиитикэ сөптөөҕүн көрдөрөр.
5. Үөһэ этиллибиккэ олоҕуран, улууспут киинигэр үрүт-үрдүгэр арыгы атыылыыр маҕаһыын, арыгы иһэрдэр кафелаах дьону сынньатар, аралдьытар киин аһылларын утарабыт уонна ону тохтотору туруорсабыт.
6. Ону ситиһэргэ биир эрэ суол баар: тэрилтэҕэ сир учаастага бэриллиэ суохтаах. Маҕаһыын аһыллар учаастагын ыллылар да, ити сиргэ кинилэр хаһаайын буолаллар, тугу баҕарбыттарын тутарга, аһарга көҥүл ылаллар. Ол федеральнай сокуоҥҥа көҥүллэнэр уонна бырааптара көмүскэнэр. Онон маннык сир учаастага аукциоҥҥа тахсыа суохтаах дии саныыбыт. Аукцион оҥоһуллубатаҕына, сири арыандаҕа да, бас билиигэ да ылбаттар.
7. Бу тэрилтэҕэ сир учаастагын арыандаҕа биэрэр аукциону тохтотор уонна сири арыандаҕа биэрбэт быһаарыыны улуус баһылыга эрэ ылынар кыахтаах.
8. Наммыт улууһун дьаһалтата, дьокутааттарын Сэбиэтэ, бу Аһаҕас сурукпутун болҕомтоҕо ылан, сөптөөх дьаһалы ылыахтара уонна арыгы атыыта тэнийэрин тохтотуохтара диэн эрэнэбит. Ыччаппытын, дьоммутун харыстыаҕыҥ, инникитин өссө сайдан, үүнэн иһэллэригэр кыһаллыаҕыҥ.
Нам улууһун уопсастыбаннаһа:
Т.А. Горохова, О.К. Лазарева, К.В. Лазарев, М.М. Пинигин, Е.Е. Дьяконов, Т.Н. Сивцева, А.И. Новиков уо.д.а. Маймаҕа, Хатырык, Модут, Хатыҥ Арыы, Бөтүҥ, Хамаҕатта, Партизан, Никольскай нэһилиэктэриттэн улуус 568 олохтооҕо илии баттаабыт.
Арыгы атыытын кэҥэтэр саҥа киини тохтотору көҕүлээччилэр “Аһаҕас суругу өйүүр илии баттааһын өссө да киирэ турар” дииллэр.
ЭРЭДЭЭКСИЙЭТТЭН: Аһаҕас сурукка ханнык тэрилтэ арыгы атыылыыр комплекс тута сатыыра биллибэт. Ону сорох сымыйаргыан сөп эрээри, “тыала суохха мас хамсаабат”, уонча нэһилиэктэн бачча элбэх олохтоох дьон сурах хоту мээнэ илии баттаабат. Өрөспүүбүлүкэ быйылгы улахан тутууларыгар ити комплекска майгынныыр эбийиэк суох. Оттон кадастр нүөмэринэн көрдөттөххө, “бас билээччи аата кистэлэҥ” диэн тахсар.
Саханы эһэ сыспыт арыгы курдук дьааты аны “култуурунайдык иһэрдэн” тарҕатар албас күөрэйиэн сөбө дьону сөпкө дьиксиннэрэр. Онон улуус салалтата бу Аһаҕас сурукка эппиэттээн, “тутуллуо суоҕа” диэн быһаарыы биэрэн уопсастыбаннаһы уоскутуо диэн эрэнэбит.
“Кыым” хаһыат.
