Бу саас ыам ыйыгар уокка былдьаммыт Моҕол ураһаны сөргүтүүгэ харчыны хомуйан бүттүлэр. Баайаҕаҕа ураһаны сөргүтэр үлэ саҕаламмыт. Улуус дьаһалтатыгар иһитиннэрбиттэринэн, бар дьон көмөтүнэн култуура ураты эбийиэгэ толору сөргүтүллэр кыахтаммыт.
Баһаар кэннэ социальнай ситимнэргэ харчы хомуурун туһунан ыҥырыы тахсаатын кытта, хас эмэ сүүһүнэн киһи уонна тэрилтэ көмөлөһөргө бэлэмин биллэрбит. Ол иһигэр биллэр-көстөр, ытыктанар дьон, биирдиилээн тэрилтэлэр, кэлэктииптэр. Араас улуус норуотун маастардара күүстээх үлэҕэ – туоһун тигиитигэр – ылсыах буолбуттар.
“Таатта улууһун бэрэстэбиитэллэрэ “сөп буолар харчы хомулунна” диэбиттэриттэн уонна бар дьон түмсүүтүттэн олус үөрдүм. Норуот маастардара тута кыттыһан, ыҥырыыны өйөөн туос үлэтигэр ылсан эрэллэр. Тэрилтэлэр, биирдиилээн дьон үбүнэн-харчынан, ким матырыйаалынан, сүбэнэн-аманана көмөлөстө”, – диэн харчы хомуурун биир бастакынан көҕүлээбит, успуорт үтүөлээх маастара, боксер Василий Егоров этэр.
Таатта улууһун дьоно-сэргэтэ өрөспүүбүлүкэ бар дьонугар эмиэ ис сүрэҕиттэн махталын биллэрэр.
Моҕол ураһа – тоҕус миэтэрэ үрдүктээх туос тутуу. 2020 с. норуот маастара, тимир ууһа, ойууһут Б.Ф. Неустроев-Мандар Уус көҕүлээһининэн тутуллубута. Бу кини хас эмэ сыллаах ыра, баҕа санаата, олоҕун тухары муспут баай билиитин кылаан чыпчаал айымньыта этэ. Ураһаны тутууга өрөспүүбүлүкэ 20 улууһуттан 300 норуот маастара үлэлээбитэ.
