Бу күннээҕи туругунан, Саха сиригэр 100 сааһын ааспыт 22 киһи олорор. Ол туһунан СӨ Үлэҕэ министиэристибэтэ иһитиннэрэр.
Аҕыйах хонуктааҕыта суруйбуппут курдук, от ыйын 1 күнүгэр 100 сааһын Дьоруой Ийэ, үлэ, тыыл бэтэрээнэ, педагог, Хаҥалас улууһун олохтооҕо Фекла Степановна Егорова туолбута. Кини “СӨ Ытык кырдьаҕаһа” бэлиэ хаһаайына уонна Хаҥалас улууһун бочуоттаах олохтооҕо буолар.
“Сүүс сыл биир түгэн курдук чыпчылайан ааста. Билэҕит дуо, ол кистэлэҥэ бэрт судургу – таптал. Улахан, иллээх дьиэ кэргэннээх, оҕолоруҥ эрийэр, сиэннэрин кэлэр буоллахтарына, киһи сааһын аахсыбат. Мин бэрэсидьиэммит Владимир Путиҥҥа уонна Ил Дархан Айсен Николаевна кыһамньыларын, кыраһыабай көстүүлээх сүүс саастаах киһи кэтэр бэлиэтин биэрбиттэрин, көмөлөрүн иһин махтанабын. Уһуннук олоруҥ, бэйэ-бэйэҕитин харыстааҥ!” – диэн ытык кырдьаҕас Фекла Степановна үбүлүөйдээх күнүгэр махтаммыта.
Саҥа социальнай-геронтология кииннэрин тутууттан саҕалаан дьиэ кэргэн араас төлөбүрүгэр тиийэ кэлим миэрэлэр ылыллар буоланнар, дьон үйэтэ уһаата, оттон Саха сирэ 2030 с. диэри олох олоруу орто сааһын 78 сааска, ол кэннэ 2036 с. 81 сааска диэрдэр былааннаах.
2024 с. өрөспүүбүлүкэҕэ улуустар ортолоругар көхтөөх уһун үйэлэнии бырагырааматын сүүмэрдээһин буолар. 2026 с. тоҕус муниципалитет өрөспүүбүлүкэ бүддьүөтүттэн барыта 7 мөл. солк. суумалаах судаарыстыба көмөтүн ылбыта. Ол харчы аҕам саастаах дьону көҕүлүүргэ туһаныллыбыта.
Субсидияны Алдан, Амма, Горнай, Мииринэй, Нам, Орто Халыма, Таатта, Хаҥалас улуустарга уонна Дьокуускай куорат үллэстибиттэрэ.
Саха сиригэр “Дьиэ кэргэн” национальнай бырайыак чэрчитинэн уһун кэмнээх көрүү-харайыы тиһигэ киирбитэ. Бу бырайыак күн бүгүн өрөспүүбүлүкэ алта улууһугар сүүһүнэн киһини хабан үлэлиир. Бэлиэтээн этэххэ, бырайыак олоххо киириэҕиттэн саҥа үлэ миэстэлэрэ тахсыбыттара, 230 исписэлиис үлэнэн хааччыллан, аҕам саастаах дьону көрө-истэ сылдьаллар.
Итини таһынан, өрөспүүбүлүкэбитигэр кырдьаҕас дьону иитэ, көрө-харайа ылар тиһик баар. 2026 с. от ыйын 1 күнүнээҕи туругунан, сүүһүнэн ыалга 245 кырдьаҕас көрүүгэ-истиигэ киирэн олорор.
Ил Дархан уонна бырабыыталыстыба дьаһалтатын пресс-сулууспата.
