Хас биирдии киһи сүрэҕэ сөбүлүүр, дууһата манньыйар дьарыгын таба тайаннаҕына, санаалыын сырдыыр, сүргэлиин көтөҕүллэр. Бүгүн кэпсиир дьоруойум блогер, өлгөм быйаҥнаах оҕуруотчут, бастыҥ хаһаайка, эдэр ийэ – Юлия Голикова.
Кини сатабыллаах хаһаайка буоларын быһыытынан тэлгэһэтэ сайын аайы киһи хараҕын үөрдэр, дууһатын сылаанньытар сиэдэрэй сибэккилэринэн симэнэр. Юлия блогар араас оҕуруот аһыттан астаммыт заготовкалар ырысыаптарын, күннээҕигэ туттуллар ас арааһын сурутааччыларыгар сырдатар.
Юлия Таатта улууһун Ытык Күөл нэһилиэгэр Ульяна Дмитриевна, Федот Петрович Павловтар дьиэ кэргэттэригэр маҥнайгы оҕонон күн сирин көрбүтэ. Бииргэ төрөөбүт бырааттаах, быйыл үөрэҕин бүтэрбит. Ийэтэ олоҕун тухары атыы эйгэтигэр, аҕата “Сахателеком”тэрилтэтигэр олоҕун устата бэриниилээхтик үлэлээбиттэр.
“Ойор-тэбэр оҕо сааһым кэмнэрин ахтабын”
– Төрөппүттэрим олус сэмэй, элэккэй дьон этилэр. Мэлдьи кэрэни кэрэхсии, олох сырдыгын үтүөтүн биһиэхэ аныыллара. Кыраттан үөрэн-көтөн, үлэни сырсан, дьоллоох оҕо саас кэмин бэлэхтээбиттэрин, күн бүгүн ахта саныыбын.
Дьоммут кыра сааспытыттан дьиэ ис-тас үлэтигэр, оҕуруот, муус ылыыта, хаар ыраастааһына, онтон да араас үлэлэргэ кими да араарбакка, бииргэ түмэн, тэбис-тэҥҥэ сылдьыһан үөрэппиттэрэ.
Хомойуох иһин, төрөппүттэрим 2021 сыллаахха утуу-субуу күн сириттэн күрэнээхтээбиттэрэ. Биллэн турар, биһиги дьиэ кэргэн улахан охсууну ылбыта. Аҕам дьон илиититтэн суох буолбута өссө эбии ыарыылаах. Ол эрээри хайаан да кырдьык күөрэйиэ диэн эрэнэбин.
Ыар сүтүкпүн кэриэстээн эбитэ дуу, оҕо сааспын, төрөппүттэрбин ахта саныы сылдьар киһи буоламмын дуу, кинилэр урут туттубут малларын, ийэм ырысыаптарын күннээҕи олохпор туттабын. Блогпун дьонум олохторун үйэтитэр уонна кинилэри сүтэрбит аһыыбын намтатар сыаллаах арыммытым.
“Блог арынарга тиийбитим”
– Идэбинэн юриспын. Оҕо эрдэхпиттэн бу идэҕэ үлэлиэхпин наһаа баҕарар этим. Баҕалаах идэбин баһылааммын, кылгас кэмҥэ да буоллар, полицияҕа үлэлии сылдьыбытым. Кэлин оҕолонуом иннинэ тэрилтэҕэ каадыр отделыгар юристаабытым. Билигин кырачаан кыыс оҕолоохпун, кэргэннээхпин.
Оҕобун көрөн олорор да буолларбын, бэйэбин бары өттүнэн сайыннарар баҕаттан, чугас дьүөгэлэрбин кытары араас кууруска үөрэнэбит. Киһи куруук үөрэххэ-билиигэ, кэрэҕэ талаһыахтаах диэммит, биир сиргэ олорбокко, төһө кыалларынан олох тэтимин кытары сайдабыт, бэйэбитигэр умнуллубат кэрэ түгэннэри бэлэх уунабыт.
Блогер буолар баҕам отой да суоҕа. Өрөспүүбүлүкэни биир гына кэпсиир туһунан түүлбэр да түһээн көрбөт этим. Эрдэ ханна да хаартыска эҥин таһаарбат этим. Дьонтон бүгэн, барытыттан сабыллан олорорум. Дэриэбинэ чуумпу олоҕор олорбуппут.
Онтон биир үтүө күн Дьокуускай куораттан дьүөгэм ыалдьыттыы кэлбитэ. Ол кэмҥэ үлэм саамай үгэнэ этэ, оҕуруот аһа хомуллан, кыһыҥҥы хаһааспын буһара сылдьар күннэрбэр оруобуна түбэспитэ.
Дьүөгэм куйаар ситимигэр миигин устан таһаарбытыгар тута элбэх киһи сэҥээрбит этэ. “Бу кыыс бэйэтэ “анал сирэйдээх” дуо? Хантан булабыт?” диэн ыйыталаспыттара. Оннооҕор төлөпүөнүнэн эрийэн кытта ыйыппыттар этэ.
Дьэ, онон “булгуччу блог арын” диэн сүбэлээбиттэрэ. Мин, ол саҕана инстаграмы* (Арассыыйаҕа бобуулаах) туттубат киһи, испэр куттана, кыбыста да буоллар, блог арынарга тиийбитим. Дэриэбинэ олоҕун, күннээҕи түбүкпүтүн, минньигэс ырысыаптары, барытын хайдах баарынан дьоҥҥо кэпсээн, көрдөрөн барбытым.
Дьон мин соҕотуопкаларбын, ырысыаптарбын туһанарыттан санаам көтөҕүллэр, күүспэр күүс, сэниэбэр сэниэ эбиллэр. Кыайан этиллибэтэх баҕа санааларбын арыйарга үөрэммитим. Уопсайынан, дьонтон куттаммакка санаабын этэн, ыарахан кэмнэрбин аһарынар буолбутум.
Үс күн иһигэр сүүһүнэн киһи блогпар суруйтарбыта. Күн бүгүн сурутааччым номнуо 32,5 тыһ. киһиэхэ тиийдэ. Бу, кыра да буоллар, ситиһиим, баҕарбатах баҕа санаам буолар. Сурутааччыларбар махталым муҥура суох.
“Дьоҥҥо үчүгэйдик сыһыаннастаххына, дьоннор эйиэхэ эмиэ үчүгэйдик сыһыаннаһаллар” диэн өйдөбүл миэхэ урут-уруккуттан баар. Олоххо улахан сүтүктэрдээх буоламмын, үтүөнү эрэ көрө сатыыбын. Онон мин блогпар куһаҕаны суруйар, ырыҥалыыр дьон суохтар.
Кыһыҥҥы хаһаас туһунан
– Сайын устата бүөбэйдээн үүннэрбит оҕуруотум аһа өлгөмнүк үүнэн, көмүс күһүнүм түмүктээх тахсарыттан олуһун астынабын. Бу хас биирдии хаһаайкаҕа саамай кэтэһиилээх кэм диэтэхпинэ, сыыспатым буолуо. Мин саныахпар, кыһыҥҥы хаһаас хаһан даҕаны хаалбат, олох ыга, толору хаһаанабын. Киһи, уопсайынан, куруук хаһаастаах буолуохтаах. Билиҥҥи үйэҕэ омук аһын атыыласпакка, дьоммутун харыстаан айылҕабыт биэрэр аһын хомуйан, бэйэбит үүннэрэн, буһаран битэмииннээх аһынан аһыырбыт буоллаҕа. Тус бэйэм сайын устата күүстээх былаан, сыал-сорук туруорунабын. Холобура, тэтэрээккэ бачча сир аһа, бачча үүнээйи, сибэкки арааһа диэн сурунабын уонна онтубун ситиһэр сыалга түһүнэрбин сөбүлүүбүн. Бэйэм курдук эдэр хаһаайкалары кытары куйаар ситиминэн тэбис-тэҥҥэ сүбэлэһэн, Саха сирин араас муннугуттан биир тэҥҥэ хардыалыырбытыттан олуһун үөрэбин, кынаттанабын.
Түмүк
Ханнык да дуоһунаска, хайа да үлэҕэ үлэлээтэргит, сүрүнэ – тугу гынаргытын таптааҥ, оччотугар үлэлииргэ көх да баар буолуо.
Эдэр хаһаайкаларга өрүү өлгөм астаах-үөллээх, үгүс үүнээйилээх, алаһа дьиэлээх, ыраас туруктаах буоларгытыгар баҕарабын. Оҕуруоту кыайа-хото үүннэриҥ, сир аһын хаһааныҥ, от-мас хомуйан, утах, чэй оҥостуҥ диэн сүбэлиибин.
– Юлия, быыс булан кэпсэппиккэр махтанабын. Аартыгыҥ өрүү аһаҕас буоллун, тус олоххор нус-хас олоҕу!
|
“Макдональдс” бөрүөк Биһиэхэ наада: Сылаас уу – 200 мл Саахар – 2 ост. ньуоска Туус – 1 чаайынай ньуоска Доруоһа – 6 гр Сымыыт – 1 уст. Мас арыыта – 40 гр Бурдук – 400 гр Начыыҥкатыгар: Ханнык баҕарар эриллибит эт – 500 гр Луук – ½ Тууһаммыт оҕурсуу – 3-4 уст. Кетчуп – 2 ост. ньуоска Майаныас – 2 ост. ньуоска Сыыр – элбэх Үрдүн оҥоруута: Сымыыт – 1 уст. Кунжут – 1 ост. ньуоска Хайдах оҥоробут: Тиэстэбитин оҥорорго биһиэхэ наада: сылаас уу, саахар, доруоһа. Опара оҥорон 5–10 мүнүүтэ кэтэһэбит. Бурдукпутугар опарабытын кутабыт, туус, мас аарыта уонна биир сымыыт. Тиэстэбитин мэһийэбит, ол кэнниттэн төкүнүтэн 20–30 мүнүүтэ үлүннэрэ уурабыт. Эриллибит эппитин уута көтүөр дылы буһарабыт. Тууһу көрөн кутаҕыт, мин өссө күөх луук кутааччыбын. Тууһаммыт оҕурсуубутун, луукпутун төкүнүк гына быһабыт, сыырбытын түөркэлээн бэлэмниибит. Аспытын барытын уочаратынан уурталыыбыт. Тиэстэбит 1/3 ылан, туспа хаппах гына уурабыт. Бөрүөкпүтүн хомуйабыт уонна үчүгэйдик хаппах оҥорон сыһыаран туттарабыт. Ол кэнниттэн 10–15 мүнүүтэ таҥаһынан бүрүйэн туруора түһэбит. Тура түспүтүн кэнниттэн үрдүн сымыытынан сотобут уонна кунжут кутабыт. Бу кэнниттэн 45 мүнүүтэ духуопкабытыгар 180 кыраадыска угабыт.
Дьиэтээҕи килиэп ырысыаба Биһиэхэ наада: Сылаас үүт – 500 мл Туус – 1 ост. нь. Саахар – 1 ост. нь. Доруоһа – 1 паачыка. Мас арыыта – 2 ост. нь. Бурдук – 800-850 гр. Хайдах оҥоробут: Бастаан сылаас үүппүтүн муос иһиккэ кутабыт уонна ингредиеннарбытын кутан доруоһабыт суураллыар дылы буккуйабыт. Бурдукпутун аа-дьуо кутан саҕалыыбыт, бу иннинэ венчик көмөтүн туһаммыт буоллахпытына, билигин ньуоскаҕа көһөбүт. Биир маасса буоллаҕына, 30 мүнүүтэҕэ туруора түһэбит. Биир маасса буоллаҕына, 30 мүнүүтэҕэ туруора түһэбит. Тиэстэбит иккис тахсааһыныгар 180 кыраадыска 1 чааска угабыт. Буһан тахсыбытын кэннэ үрдүн ынах арыытынан биһиэххэ сөп уонна өссө биир чааска сойута хаалларабыт. Ийэлэрбит астаабыт олус минньигэс килиэптэрэ бэлэм буолла!
|
Татьяна ЖАНЧИКОВА.
