Өрөспүүбүлүкэ орто анал үөрэҕин кыһаларыгар бүддьүөт миэстэтигэр туттарсыы түмүктэнэрэ икки күн хаалла. Бүгүҥҥү туругунан, “Госуслуги” порталынан абитуриеннартан 45 953 сайабылыанньа киирбит. Ол туһунан “Саха.гов.ру” суруйар.
“Саха сирин олохтоохторуттан орто үөрэххэ туттарсарга “Госуслуги” порталынан 46 тыһыынча кэриҥэ сайабылыанньа киирдэ. Ити – сыыппара сиэрбиһэ олус наадалааҕын туоһулуур. Билигин абитуриеннар айаҥҥа-сырыыга бириэмэлэрин бараабакка, тутар хамыыһыйаларга тиийэ сылдьыбакка, докумуоннарын онлайн ыытыахтарын сөп. Ол биһиги курдук киэҥ сирдээх-уоттаах өрөспүүбүлүкэҕэ олус суолталаах”, – диэн инновация миниистирэ Петр Николаев санаатын үллэстибит.
Бэлиэтээн эттэххэ, быйыл Арассыыйа үрдүнэн колледжтарга уонна техникумнарга “Госуслуги” порталынан барыта 2 мөлүйүөнтэн тахса сайабылыанньа киирбит. Ол былырыыҥҥыттан хас эмэ бүк элбэх.
Орто анал үөрэх кыһаларыгар бүддьүөт миэстэтигэр сайабылыанньаны тутуу атырдьах ыйын 15 күнүгэр түмүктэнэр. Сайабылыанньаны, үөһэ этиллибитин курдук, судаарыстыба өҥөтүн порталынан ыытыахха сөп.
