В.А. Вонгродскай аат. Дьокуускайдааҕы мэдиссиинэ колледжыгар анал байыаннай дьайыы кыттыылаахтарыттан уонна кинилэр дьиэ кэргэттэриттэн барыта 84 сайабылыанньа киирбит. Ол туһунан үөрэх кыһатын салайааччыта Дмитрий Алексеев кэпсээтэ.
Үөрэххэ туттарсыы сайабылыанньатын биэрбит абитуриеннартан тоҕуһа – анал байыаннай дьайыы кыттыылааҕа, 71 киһи – АБДь кыттыылааҕын оҕото, 4 – АБДь кыттыылааҕын огдообото. Түмүк атырдьах ыйын 23 күнүгэр тахсыахтаах.
“Үөһэ ахтыллыбыт гражданнар үөрэххэ киирэр приоритетнай бырааптаахтар. Атырдьах ыйын 23 күнүгэр кинилэри үөрэххэ ылар туһунан бастакынан быһаарыахпыт. Анал байыаннай дьайыы кыттыылаахтарын уонна кинилэр дьиэ кэргэннэрэ үөрэҕи баһылыыр бырааптара тутуһулларын СӨ Үөрэххэ уонна билимҥэ министиэристибэтэ кыраҕытык хонтуруоллуур”, – диэн Дмитрий Алексеев эттэ.
