М.К. Аммосов аат. Хотугулуу-Илиҥҥи федеральанй университекка 2 800-тэн тахса абутириент докумуонун туттарбыт. Үөрэх кыһатыгар барыта 11 тыһыынчаттан тахса сайабылыанньа киирбит: хас биирдии абитуриент ортотунан түөртүү хайысхаҕа туттарсыбыт. Ол туһунан Киин тутар хамыыһыйа иһитиннэрэр.
ХИФУ Киин тутар хамыыһыйатын салайааччыта Елизавета Ильина этэринэн, үөрэххэ тутуу хампаанньа бэрт көхтөөхтүк бара турар.
“Хас биирдии туттарсааччы ортотунан түөртүү хайысханы талар – оҕолор үөрэх хайысхаларын олохтоохтук толкуйдаан баран талаллар. Тутуу хампаанньата салҕанар, түмүктэнэрин саҕана куонкурус балаһыанньата уларыйар чинчилээх. Ол да буоллар, бэл, билигин этиэххэ сөп: абитуриеннар ким ханна туттарсарын чопчу өйдөөн-төйдөөн туран кэлэллэр”, – диэн Елизавета Ильина бэлиэтиир.
Саамай күүстээх куонкурустаах хайысхалар – юриспруденция, стоматология, угуйук уонна уопсастыбаннаһы кытта ситим, менеджмент уонна лингвистика. Холобур, юриспруденция “Правовое обеспечение правоохранительной деятельности” салаатыгар 1 миэстэҕэ 19,1 оҕо куонкурустаһар, “Юриспруденция” салааҕа – 17,4 оҕо, “Стоматологияҕа” – 13,1 оҕо. Итини таһынан, “Реклама и связи с общественностью” салаа куонкуруһа эмиэ элбэх – миэстэҕэ 12,2 киһи, “Менеджмент” “Управление бизнесом” салаатыгар – 11,6 киһи, “Лингвистикаҕа” – 11,3 киһи.
Туттарсар абитуриент ахсаанынан саамай элбэх киһи Мэдиссиинэ институтугар анньыһар – 477 киһи. Ол кэннэ Математика уонна информатика уонна Инженернэй-тэхиньиичэскэй институттарга: ити кыһаларга хас биирдиилэригэр 200-тэн тахсалыы оҕо докумуонун туттарбыт.
ХИФУ-га күнүскэ уонна кэтэхтэн үөрэххэ докумуону тутуу бэс ыйын 20 күнүттэн саҕаламмыта. Бүддьүөт миэстэтигэр сананар, киирии тургутугу ааһар абитуриеннар докумуоннарын от ыйын 19 күнүгэр тутан бүтэллэр. СКЭ түмүгүнэн киирэччилэр киэнин – от ыйын 25 күнүнэн.
Төлөбүрдээх үөрэххэ киирээччилэр докумуону туттарар болдьохторо атын – кинилэр тутар хампаанньалара атырдьах ыйын 21 күнүгэр түмүктэнэр. Оттон СКЭ-лээхтэр киэнэ – атырдьах ыйын 26 күнүгэр.
