М.К. Аммосов аат. ХИФУ-га 2026—2027 сс. үөрэх дьылыгар үөрэххэ туттарсыыга уонна төлөбүрдээх үөрэххэ хааччахтааһын олохтонуутугар сыһыаннаах кэккэ уларыйыылар киириэхтэрэ. Ол туһунан кыһа пресс-сулууспата иһитиннэрэр.
Икки улахан уларыйыы киирбит. Бастатан туран, СКЭ алын баала үрдээбит – мантан антах 40-тан кыра бааллаах абитуриент ХИФУ-га санаммат да буолбут.
2026—2027 сс. үөрэх дьылыгар СКЭ алын баала маннык буолбут:
Физика: 39 баалтан үрдээн 41 баал буолбут;
Устуоруйа: 36 баал этэ – 40 баал буолбут;
Информатика: 44 баал этэ – 46 баал буолбут;
Омук тыла: 30 баал этэ – 40 баал буолбут;
Биология уонна хиимийэ: 39 баал этэ – 40 баал буолбут.
Атын биридимиэттэр бааллара, хата, уларыйбатах: нуучча тылыгар, математикаҕа (профиль таһыма), литэрэтиирэҕэ уонна географияҕа – 40, обществознаниеҕа – 45 баал.
Төлөбүрдээх үөрэххэ лимиит киирбит. Иккиһинэн, дойду бырабыыталыстыбатын дьаһалынан, кэккэ хайысхаларга үөрэнэр миэстэҕэ хааччахтааһыннар киирэннэр, мантан антах ХИФУ-га, бэл, төлөбүрдээх үөрэххэ улахан куонкуруһунан киирэр буолбуттар. Ити ордук архитектура, ньиэп-гаас, психология, экэниэмикэ, менеджмент, юриспруденция, суруналыыстыка, стоматология, хайа дьыалатын, тыл үөрэҕин, лингвистика эйгэлэригэр сыһыаннаах. Атыттарга да суох буолбатах.
Ректор Анатолий Николаев үөрэх хаачыстыбатын тупсараары уонна экэниэмикэ дьиҥнээх ирдэбилигэр сөп түбэһиннэрээри уларытыыны киллэрбиттэрин туһунан этэр.
