Ил Дархан Айсен Николаев РФ үөрэх миниистирин Сергей Кравцовы кытта көрүстэ. Кинилэр оскуолаларга уонна уһуйааннарга эбии миэстэлэри таһаарар туһунан боппуруоһу дьүүллэстилэр.
Айсен Сергеевич бу күҥҥэ өрөспүүбүлүкэ үрдүнэн үстэригэр диэри саастаах, уһуйааҥҥа уочаракка турар оҕо ахсаана 17 426 буолбутун иһитиннэрдэ. РФ үөрэх министиэристибэтин уонна СӨ бырабыыталыстыбытан сөбүлэҥин чэрчитинэн, 2019-2021 сылларга 10 уһуйааны тутууга федеральнай бүддьүөттэн 2,2 млрд солк үп көрүллүбүтүн бэлиэтээтэ. Ону таһынан, сыл аайы бары үбүлээһиннэр көмөтүнэн 10 оскуола үлэҕэ киирэрин эттэ.
2023 сылга диэри өрөспүүбүлүкэтээҕи уонна федеральнай бүддьүөттэн 3270 миэстэлээх 19 оскуола тутуллара былааннанар.
Ил Дархан дойду бэрэсидьиэнэ Владимир Путин соругун толорорго, 2026 сылга диэри хаарбах туруктаах оскуолалартан оҕолору көһөрүүгэ, 41,5 тыһ саҥа миэстэни таһаарарга 50 тахса млрд солк үп ирдэнэрин эттэ. Манан сибээстээн министиэристибэҕэ эрэгийиэннэр оскуолаларын материальнай-техническэй базаларын учуоттаан, оскуола дьиэлэрин тутууга федеральнай бүддьүөттэн көрүллэр үбүлээһини хат көрүүгэ этии киирбитэ.
Ону таһынан, “Арктика оҕолоро” диэн арктическай эрэгийиэннэргэ олорор оҕолорго сөптөөх усулуобуйаны тэрийиигэ туһуламмыт, РФ судаарыстыбаннай бырагыраамматын оҥорууну дьүүллэстилэр. Бу бырагыраамма судаарыстыбаннай өйөбүл миэрэлэрин көрөр. Бу көҕүлээһини Архангельскай уонна Мурманскай уобаластар, Ямало-Ненецкэй, Ханты-Мансийскай уонна Чукотскай автономнай уокуруктар, Карелия уонна Коми өрөспүүбүлүкэлэрэ өйөөтүлэр. Бу туһунан СӨ бырабыыталыстыбатын пресс-сулууспата иһитиннэрэр.
