Трамп Мадуроны туппутуттан тохтообокко, Венесуэланы 51-с штат оҥостоору гынар. Оттон кыһын 51-с штат буолар “чиэһи” Канадаҕа биэрэ сатаабыта. Ону сөбүлэспэккэ, утарсыбыт буруйдарыгар, хаһан эмэ Гренландия кэннэ 53-с штат буолар саппааска киирдилэр быһыылаах. Арктика дойдуларын дьылҕатын эрдэ быһаарыан, Ираҥҥа муннуга бэрдэрэн, уһатан эрэр быһыылаах. Онон кыһыытын-абатын чугастыы Кубаны кум-хам тутан таһаараары гынар курдук.
Кини: “Былааһын уларыттахха, Куба толору дьоллоох буолуоҕа, сотору дьарыктаныахпыт”, — диэн суоһурҕаммыта ыраатта. Өссө Трамп Кытайга барыан иннинэ, сымыйаны тарҕатар диэн сөбүлээбэт CNN телеханаала, Эмиэрикэ эрэспиэскэһит сөмөлүөттэрэ олунньуттан Куба Гавана уонна Сантьяго-де-Куба куораттарын үрдүнэн чуҥнаан 25-тэ көппүттэрин туһунан кэпсээбитэ. Сөмөлүөттэр кубалары сэнээн, куттаан да буолуо, кимнээхтэрин көрдөрөр гына, транспортёрдарын уотун умулларбакка көппүттэр.
Ити сөмөлүөттэр былырыын балаҕан ыйыттан Венесуэла үрдүнэн эмиэ көппүттэр эбит. Ираҥҥа саба түһүөх иннинэ эмиэ өр чуҥнаабыттар да, Иран кистэлэҥ байыаннай күүһүн булбатахтар.
Кубаҕа улахан охсууну ньиэп ыла олорбут Мадуротын суулларан оҥордулар. Хас да ый ньиэбэ, уматыга суох олордо. АХШ Кубаҕа ньиэп киирэрин хаайан, элэктэриичэстибэтэ, тиэхиньикэ сүүрэр уматыга суох оҥордо. Дьону кыынньаан былааһы абааһы көрүүнү, бырачыастаан уулуссаҕа тахсыыны күөртүү сылдьаллар.
Фидель Кастро социализмын Көҥүлүн Арыытын былааһын суулларарга Трамптааҕар ордук Кубаттан төрүттээх АХШ госсэкирэтээрэ Марко Рубио тууһугурар. Кинилэр сэриинэн тµспэккэ, Фидель Кастро быраата, 94 саастаах Рауль Кастроны 1996 с. Куба Эмиэрикэ гуманитарнай тэрилтэтин икки сөмөлүөтүн суулларыыга, эмиэ наркотигы тар±атыыга буруйдаан, Мадуроны курдук тутаары гыналлар эбит. Куба былааһын иһигэр эмиэ харчыга таҥнарыахсыттары булан эрдэхтэрэ.
Балаһыанньалара чахчы кытааппыт. Ыам ыйын 15 күнүгэр Куба энэргиэтикэтин миниистирэ биллэрбитинэн, хантан да ньиэп кэлбэккэ, бүтэһигин Арассыыйа көмөҕө ыыппыт икки танкерын ньиэбэ, уматык бүппүт. Атын ким да көмөлөһөр кыаҕа, санаата суох. Гаванаҕа уоту сууккаҕа 1-2 чаас эрэ биэриэхтэрин сөп эбит. Ол түмүгэр түүнүн бырачыас саҕаланан, ыччат дьон сабыылаах сирэйдээх уулуссаҕа тахсан барбыттар, суолу-ииһи бүөлүүллэр, бөҕү уматаллар, араас луоһуну хаһыытыыллар. “Өҥнөөх” өрөбөлүүссүйэ саҕаланыах курдук.
Дьиктитэ диэн баар, 1924 с. төрүттэммит ССРС судаарыстыбата 67 сылынан сууллубутун курдук, Кубаҕа 1959 с. төрүттэммит социализм эмиэ 67 сылынан эстиэн сөп буолбут. Сонньуйан эттэххэ, быйыл аан дойду үрдүнэн Интэриниэккэ тарҕаммыт “сикс-сэвэн” (67) диэн ыччаттар мемнэрэ туох эрэ миистикэлээх сыыппара быһыылаах дуу диэх курдук.
Конспирология өттүттэн эбэн эттэххэ, Эмиэрикэ салалтата көҥү кутуллан социалистическай Кытайга ыалдьыттаан кэлэн баран, Кубаҕа социализмы суулларан, Си Цзиньпиҥҥэ “хомуньуустардыын маннык кэпсэтэбит” диэн таайтаран, куттуур илдьити ыытыы да курдук өйдүөххэ сөп. Кини Трамптан “былыргы Греция бөлүһүөгэ Фукутид “аан дойдуга икки кµµстээх дойду батан олорбокко сэриилэһэллэр” диэбитин тумнан, “эйэлээхтик олорор кыахтаахпыт дуо?” диэн быһаччы ыйыппыта.
Куба, 1963 с. ССРС ядернай иитиилээх аракыаталары туруорарын көҥүллээн, Эмиэрикэни куттаан, аан дойдуну “бэстилиэннэй тыһыынчаттан” быыһаабыта. Ол үтүөтүн биһигиттэн атын ким да санаабат быһыылаах.
Куба, Эмиэрикэттэн көмүскэнээри, Арассыыйаттан быһаас байыаннай дроннары атыыласпыт. Иран курдук Эмиэрикэ саба түстэҕинэ, ытыалыырга бэлэмнэнэр курдук.
... Урут Куба өрөбөлүүссүйэтин арамаантыката аан дойдуну барытын хаппыта.
“Куба — любовь моя,
Остров зари багровой.
Песня летит над планетой звеня —
Куба — любовь моя!”
диэн уоттаах-күөстээх тыллардаах ырыа ССРС баарын тухары ылланара. Фидель Кастро, Че Гевара курдук элбэх көлүөнэ дьоруойа буолбут дьон дьулуспут идиэйэлэрэ, баҕалара күдэҥҥэ көтөн хаалыан сөбө саныырга ыарахан.
Владимир Степанов
Хаартыска: REUTERS
