Убаастабыллаах биир дойдулаахтарым, күндү бар дьонум!
Бу дьыл алтынньы 15 күнүттэн, сэтинньи 14 күнүгэр диэри бүтүн Арассыыйатааҕы нэһилиэнньэ биэрэпиһэ ыытыллаары турар. Бу уон сылга биирдэ эрэ буолар, бүтүн дойду, өрөспүбүлүкэ хас биирдии олоҕор сүҥкэн суолталаах – улахан тэрээһин.
Биэрэпис бу ааспыт уон сыл иһигэр тахсыбыт уларыйыылары эрэ көрдөрөр буолбатах, маныаха олоҕуран инники олохпут сайдар кэскилин уһансарга сүрүн төһүү, тирэх буолуоҕа. Ол иһин соччонон суолталаах, Бүтүн Арассыыйатааҕы нэһилиэнньэ биэрэпиһин түмүгэ ырылаччы чопчу түмүктэри көрдөрөрө, онно көстөн тахсыа биһиги өрөспүүбүлүкэбитигэр бу сыллар устата олох-дьаһах, быһыы-майгы уопсастыбаҕа, күннээҕи олохпутугар төһө уларыйбыта. Ол туһугар эһиги, күндү бар дьонум, хас биирдиигит кыттара – кырата суох оруоллаах.
Биэрэпис түмүктэрэ стратегическай быһаарыылары ылынарга, социальнай, демографическай уонна социальнай бырагырааммалары олоххо киллэрэргэ бигэ өйөбүл, акылаат буолуохтара. Сахабыт сирэ инники сайдыытыгар, хас биирдии киһи олоҕор саҥа, сонун уларыйыылар киирилэригэр – Бүтүн Арассыыйатааҕы биэрэпис суолтата үрдүк.
Быйыл, Бүтүн Арассыыйатааҕы нэһилиэнньэ биэрэпиһэ, хамсык кэмигэр биһиги олохпутугар бигэтик киирбит цифровой технологиялары киэҥ далааһыннаахтык туһаныллан ыытыллыаҕа. Бу барыта – дьон доруобуйатыгар куттал суоһаабатын туһугар. Хас биирдии гражданин, биэрэпискэ, Судаарыстыбыннай Өҥөлөр порталларын нөҥүө, дьиэтиттэн, эбэтэр үлэтиттэн олорон холкутук кыттар кыахтаныа.
Өрөспүүбүлүкэтээҕи көрдөрөр-иһитиннэрэр эйгэлэр бу суолталаах тэрээһиҥҥэ, күүскэ үлэлэһиэхтэрэ диэн эрэнэбин. Биэрэпис илииһигэр ыйыллыбыт боппуруостарга үтүө санааҕытынан хоруйдааһыҥҥыт, инники олохпут чэчирии сайдарыгар улахан төһүү буоларыгар мин итэҕэйэбин.
Күндү бар дьонум, Бүтүн Арассыыйатааҕы нэһилиэнньэ биэрэпиһэ ситиһиилээхтиик ааһарыгар бары биир киһи курдук көхтөөхтүк кыттыаххайыҥ
