Саха сирин эрэгийиэнин салайар Киин, өрөспүүбүлүкэтээҕи үөрэҕирии уонна билим министиэристибэтигэр сигэнэн иһитиннэрэринэн, ойуур баһаарыттан ордук күүскэ эмсэҕэлээбит Горнай улууһун Бэс Күөлүн нэһилиэгэр, 150 миэстэлээх саҥа оскуола тутан дьэндэтиэхтэрэ. Оскуоланы, Мэҥэ-Хаҥалас улууһун Балыктаах нэһилиэгэр бу соторутааҕыта тутуллубут аныгылыы быһыылаах-таһаалаах көрүҥүнэн тутуохтара.
Эрэгийиэннээҕи үөрэҕирии уонна билим министиэристибэтэ биллэрэринэн:”Аныгылыы, толору хааччылыылаах уораҕайга 150 оҕо үөрэнэр кыахтаныа. Оскуолаҕа, таһаарыылаахтык үөрэтэргэ туох баар усулуобуйа барыта оҥоһуллуоҕа”.
Икки этээстээх оскуола уопсай иэнэ – 2680 кв.м.
Бырайыак сыаната – 322 мөл.солк.
Бэс-Күөл сэлиэнньэтин эргэ оскуолата ааспыт үйэ 80 сс сылларыгар тутуллубута. Онно билигин 120-ттэн тахса оҕо үөрэнэр. Билии кыһатыгар билиҥҥитэ 28 педагог үлэлиир.
