Ватсабынан, социальнай ситимнэринэн “Мииринэйгэ АЛРОСА үлэһитэ коронавирус аҕалбыт” диэн ис хоһоонноох иһитиннэрии тарҕана сылдьар.
Мииринэй оройуонун киин балыыһатын кылаабынай бырааһа Татьяна Стручкова “ити отой сымыйа дойҕох, оройуоҥҥа коронавирус инфекцията булуллубатаҕа”, - диир.
Бүтэһик дааннайдарынан, аан дойду үрдүнэн ааспыт суукка иһигэр 10 982 киһи коронавирус ыарыыга сутуллубут, 343 киһи өлбүт. Бу туһунан доруобуйа харыстабылын аан дойдутааҕы тэрилтэтэ иһитиннэрэр.
Инньэ гынан, уопсайа аан дойду үрдүнэн 153 517 киһи сутуллубут, 5375 киһи өлбүт. Кытайы аахсыбатахха, аан дойдуга 72 469 киһи бусаҥа ыарыыга ылларбыт, 2531 киһи өлбүт. Уопсайа 140-тан тахса дойдуга бу ыарыы бэлиэтэнэр. Арассыыйаҕа 63 киһи ыалдьыбыта биллэр.
