Бырабыыталыстыба бэрэссэдээтэлин солбуйааччы Дмитрий Садовников өрөспүүбүлүкэни уматыгынан хааччыйар суһал ыстаап мунньаҕын ыытта. Онно этиллибитинэн, от уонна атырдьах ыйдарыгар от үлэтин кэмигэр тыа хаһаайыстыбатын оҥорон таһаарааччыларын уматыгынан-оҕунуоҕунан хааччыйар туһугар, кэлим хааччыйар тиһик тэриллибит.
Ол тиһик чэрчитинэн улуустар, былаас толоруулаах уорганнара уонна уматык хампаанньала хардары билсэ олорон үлэлиэхтэрэ.
Тыа хаһаайыстыбатын оҥорон таһаарааччылара, ол иһигэр кэтэх хаһаайыстыбалар, төһө уматыкка наадыйалларын муниципальнай тэриллии бигэргэтиэхтээх, оччоҕуна кыһалҕалаах дьон уматыгы сапыраапкалартан куттуохтаахтар. Уматыгы улууска баар уматык хампаанньалара бары кутуохтара.
Тыа хаһаайыстыбатын миниистирэ Артем Александров иһитиннэрбитинэн, министиэристибэ улуустартан дааннайдары хомуйан бүтэн эрэр. Тыа хаһаайыстыбатын тэрилтэлэрэ, бааһынайдар уонна кэтэх хаһаайыстыбалар сайаапкаларын учуоттаан, өрөспүүбүлүкэ барыта төһө уматыккка наадыйарын быһаараллар.
А.Александров эппитинэн, тыа хаһаайыстыбатын суһал ыстааба күнүстэри-түүннэри кэриэтэ үлэлии олорор. Уматыгынан барыта 25 тыһыынча кэриҥэ субъект, ол иһигэр кэтэх хаһаайыстыба, 400 кэриҥэ тыа хаһаайыстыбатын тэрилтэлэ уонна кэпэрэтиибэ, ону сэргэ 2,5 тыһыынча бааһынай хаһаайыстыба уонна урбаанньыт, хааччыллыахтаах.
