От ыйын 1 күнүгэр Хаҥалас Тиит Арыытын олохтооҕо, Дьоруой Ийэ уонна педагогтар удьуордарын төрүттээччи Фекла Егорова 100 сааһын тору-томточчу туолла. Ытык кырдьаҕаһы үйэлээх үбүлүөйүнэн улуус баһылыга Сергей Гребнев, үөрэх миниистирин солбуйааччыта Ньургун Павлов, улуус дьокутааттарын мунньаҕын салайааччыта Анатолий Антонов уо.д.а. эҕэрдэлээтилэр.
Фекла Степановна Егорова 1926 с. от ыйын 1 күнүгэр оччолорго Орджоникидзевскай оройуонун Харыйалаах сэлиэнньэтигэр төрөөбүтэ. 1942 с., өссө оскуолаҕа сылдьан, Ворошилов аатынан Холкуоска оробуочайынан үлэлии киирбитэ. 1943 с. аҕалаах убайа сэриигэ ыҥырыллыбыттарын кэннэ, ийэтиниин ыччат сүөһүнү көрбүтэ.
Сэрии кэннэ 1945—1947 сс. Дьокуускайга Рабфакка үөрэммитэ, ол кэннэ үс ый тыа сирин учууталларын бэлэмниир суһал кууруска үөрэммитэ. Кини оҕолорго алгебраны, геометрияны уонна физиканы үөрэппитэ. 11 сыл алын кылаас учууталынан, онтон 19 сыл Тиит Арыы уһуйаанын сэбиэдиссэйинэн үлэлээбитэ.
1949 с. Фекла Степановна сэрии бэтэрээнэ Николай Егоровка ойох тахсан ыал буолбута. Егоровтар 34 сыл дьоллоохтук олорбуттара, уон оҕоҕо күн сирин көрдөрбүттэрэ. Онтон алта оҕо үөрэҕирии эйгэтин талан, бүтүн педагогтар династиялара төрүттэммитэ.
Үбүлүөйдээх Далбар Хотуҥҥа Арассыыйа бэрэсидьиэнэ Владимир Путин эҕэрдэ тэлэгирээмэтин, Ил Дархан Айсен Николаев эҕэрдэ суругун уонна “Үйэ саас” бочуоттаах бэлиэни туттардылар, 1 мөл. солк. бэлэхтээтилэр. Итини сэргэ Фекла Степановна Егорова Хаҥалас улууһун Ытык олохтооҕо буолла.
