Кэлиҥҥи билгэлээһиннэртэн көрдөххө, Саха сиригэр Өлүөнэ өрүс ыам ыйын иккис декадатын бастакы аҥаарыгар эстиэх курдук. Бу күннэргэ сорох сирдэргэ Өлүөнэ, Бүлүү, Халыма, Алдан, Амма, Нүүнэ уонна Токо өрүстэр муустарын эрбээбиттэр.
СӨ гражданской оборуона миниистирэ Дмитрий Лепчиков кэпсээбитинэн, Өлүөнэ мууһа 1—3 күн эрдэлээн барыа үһү. Ол быһыытынан, муус Ленскэйгэ ыам ыйын бастакы декадатын бүтүүтүгэр, Хаҥаласка, Намҥа уонна Дьокуускай аннынан иккис декада саҥатыгар барыахтаах. Алдан, Амма уонна Бүлүү 2—4 хонук эрдэлиэхтээхтэр – ый иккис аҥаарыгар барыахтаахтар. Хоту уонна хотугулуу-илин сытар өрүстэр, үгэс курдук, муустара ыам ыйын үһүс декадатыгар – бэс ыйын саҥатыгар хамсыахтаах. Оттон Зырянка аннынан Халыма өрүс – иккис декадаҕа.
Муус ордук Ленскэйгэ, Хаҥаласка, Намҥа уонна Дьокуускай анныгар харыан сөп. Бүлүү өрүскэ – Бүлүү улуугар, Халымаҕа – Үөһээ уонна Орто халымалар анныларынан. Муус хардаҕына уу 1—2 миэтэрэнэн үрдээн, “кутталлаах” дэнэр кирбиигэ тиийэр кутталлаах. Өлүөнэ, Дьааҥы уонна Индигиир өрүстэр атын сирдэригэр муус харар чинчитэ 10% үһү.
Быйыл Саха сиригэр 26 улууска 121 нэһилиэнньэлээх пуун ууга барар кутталлаах. Онно барыта холбоон 24,3 тыһыынча киһи олорор. Халаан уута уопсайа 6 629 дьон олорор дьиэтин, 223 – социальнай суолталаах, 51 – экэниэмикэ, 99 – олоҕу хааччыйар эбийиэги ылыан сөп.
Ол да буоллар, РФ МЧС Киин аппараатын бэрэбиэркэтин (кулун тутар 23—27 күннэринээҕи) түмүгүнэн, “Саха сирэ сааскы халааны көрсөргө бэлэм” диэн буолбут.
