Балаҕан ыйын 5-8 күннэригэр Владивосток куоракка ыытыллар Илиҥҥи экэниэмикэ форумугар (ВЭФ) Саха сирэ 90 млрд солк. инвестицияны тардарга 30-ча сөбүлэҥи түһэрсэри былаанныыр. Бу туһунан Ил Дархан уонна бырабыыталыстыба дьаһалтатын пресс-сулууспата иһитиннэрэр.
“Саха сирин инвестиционнай килиимэтин оҥоруу уонна инвестордары тардыы хас да түһүмэхтэн турар, үгүс сыраны-сылбаны, бириэмэни эрэйэр улахан үлэ. Оттон ити форумҥа ол уһун-унньуктаах, сыралаах үлэ тиһэх чааһа ыытыллар – сөбүлэҥ түһэрсиллэр. Дьэ, ол кэнниттэн бырайыагы олоххо киллэриигэ сүрүн үлэ түһүмэхтэрэ саҕаланаллар. Бырайыактары олоххо киллэрии өрөспүүбүлүкэҕэ олох таһымын үрдэтэргэ төһүү буолар”, – диэн Айсен Николаев тоһоҕолоото.
ВЭФ кэмигэр өрөспүүбүлүкэ Усуйаанатааҕы хайа бырамыысыланнаһын кластерын, түргэн тэтимнээх ВОЛС интэриниэт лииньийэтин магистральнай ситимин кэҥэтии, Амма–Сулҕаччы хайысхатынан үрдүк күүрүүлээх уот лииньийэтин тардыы уонна “Амма” подстанциятын тутуу, суола-ииһэ суох, ыраах нэһилиэктэргэ почта салааларын бөдөҥсүтүү, ньиэп-гаас эбийиэктэрин саҥардыы, Дьокуускайга “Байыаннай чаас” кыбартаалыгар олорор дьиэлэри тутуу уо.д.а. бырайыактары олоххо киллэриигэ сөбүлэҥнэри түһэрсэр былааннаах.
Маны таһынан өрөспүүбүлүкэ Забайкалье кыраайын, Кемерово уобалаһын уонна Чукотка автономиялаах уокуругун бырабыыталыстыбаларын кытары бииргэ үлэлэһэргэ сөбүлэҥи түһэрсиэхтэрэ.
Санатар буоллахха, былырыын Илиҥҥэ экэниэмикэ форумугар Саха сирэ 25 млрд солк. суумалаах 40 сөбүлэҥи түһэрсэн турар.
Быйылгы VII Илиҥҥи экэниэмикэ форума “На пути к многополярному миру” диэн тиэмэҕэ ыытыллыаҕа.
