"Маһы ыллатар уран тарбах" диэн Ньурба улууһун Антоновкатын пааркатыгар мас уустарын күрэҕэ буолан ааста. Уустар Ньурба улууһун устуоруйатыгар, үһүйээннэригэр, номохторугар олоҕуран, олус дириҥ ис хоһоонноох, тупсаҕай итиэннэ хатыыламмыт оҥоһуктары оҥорон олохтоохторго бэлэх ууннулар. Күрэх түмүгүнэн бастыҥ хамаандалар ааттаннылар.
Кыайыылаах Таатта хамаандата: Давид Габышев, Федор Павлов – Октябрьскай нэһилиэк дьаһалтатыттан 130 тыһ. солк.
Иккис миэстэҕэ Ньурбаттан "Өҥөлдьө" хамаанда: Герасим Максимов, Дмитрий Максимов – урбаанньыт Марианна Быгый 100 тыһ. солк. туттарда.
Үһүскэ Нам Модутун хамаандата: Василий Аргунов, Екатерина Степанова – урбаанньыт Юрий Елеусизовтан 80 тыһ. солк.
Атын сэттэ хамаандаҕа барыларыгар анал ааттар, спонсордартан анал бириистэр туттарылыннылар.
Бу күрэх истиҥ сыһыан, доҕордоһуу, түмсүү, саха сатабылын өрө тутуу түһүлгэтэ. Барыларыгар эҕэрдэ, барыларыгар махтал!
“Бу күрэх Антоновка нэһилиэгин пааркатын олус тупсарда, дьон-сэргэ сынньана, хаартыскаҕа түһэ бүтүн дьиэ кэргэнинэн кэлэригэр аһара бэртээхэй буолла”, – диэн олохтоохтор санааларын үөрэ-көтө үллэһиннилэр.
Kyym.ru.
Хаартыска: Лиана Иудина.
Видео: Антоновка нэһилиэгин сонуннара.
